නිවසකට රාත්‍රී ඇතුළු වූ හොරකු වටිනා බඩු හොරකම් කරගෙන යන අතරේ කුස්සියට ගොස් තේ එකක්ද හදාගෙන බී ගිය සිද්ධියක් නාගරික ප්‍රදේශයකින් අසන්නට ලැබිණි.

මෙම නිවස ජනාකීර්ණ ප්‍රදේශයක පිහිටියේය. නිවැසියන් තද නින්දේ සිට ඇත. අලුයම් කාලයේ නිවසේ පසුපස අගුළු නොදැමූ දොරකින් ඇතුළු වූ හොරෙක් නිවසේ අය තද නින්දේ පසුවෙන බව දැනගෙන එහි තිබූ වටිනා විදුලි උපකරණ කිහිපයක් සොරාගෙන පිටව ගොස් ඇත. අලුයම් කාලයේ නිවෙස් හිමියාගේ බිරිය කුඩා දරුවකුට කිරි එකක් හදාදීම සඳහා නැගිට කුස්සියට ගියවිට රාත්‍රී නින්දට පෙර උණු වතුර බෝතලයට දැමූ වතුර අඩුවී තිබෙනු දැක ඒ ගැන සොයද්දී කවුරු හෝ තේ හදාගෙන බී තිබෙන බව දැක ඇත. සැමියා පමණක් නිවසේ සිටින නිසා ඔහු ගැන සැකසිතී ඒ ගැන ඇසූවිට ඔහුත් කිසිවක් නොදන්නා බව කීම නිසා බිරිය තවදුරටත් සොයද්දී නිවසේ බඩු මුට්ටු හා රෙදි අවුස්සා තිබෙනු දැක ඇති අතර කාමරයක තිබූ විදුලි උපකරණයක් නැතිව ඇති බව වැටහී ඇත. මේ බව බිරිය සැමියාට කියද්දී අනුමානයක් නෑ හොරෙක් ඇවිල්ලා. ඒකා තේ හදාගෙන බීලත් ගිහින්. මේකා හොරෙක් නොවෙයි කම්බ හොරෙක්. නිකමටවත් සද්දයක් ඇහුනේ නෑනේ. මම හැමදාම කියනවා නින්දට යන්න කලින් ගෙදර දොර ජනෙල් හොඳට වහලද කියලා බලන්න කියලා. මේක හොඳ පාඩමක් යැයි කියා නිහඬවී ඇත. 
(වැල්ලම්පිටිය - ශාන්ත සෙනෙවිරත්න)