අන් අය නිෂ්පාදනය කරන දොදොල්වලට වඩා තමන් නිපදවන දොදොල් ප්‍රමිතිය ඉහළින් තබා පුරාජේරු කථා කළ මිතුරාට ඔහු විසින් දොදොල් කළු පාට කිරීමට යොදන අමුද්‍රව්‍ය රහස අනෙක් දොදොල් නිෂ්පාදන මිතුරා ප්‍රසිද්ධියේ හෙළිකිරීම නිසා ලැජ්ජාවට පත් වූ කළු දොදොල් නිෂ්පාදකයා තම මුහුණේ දැලි ගෑවා පමණක් නොව තමා කබලෙන් ළිපට ඇද දැම්මා යනුවෙන් මිතුරාට දොස් පවරමින් ලිස්සා ගිය පුවතක් වැලිමඩ නගරයේ රස කැවිලි අලෙවිසලකින් අසන්නට ලැබේ. 

දැන ගන්නට ඇති අන්දමට මෙම මිතුරන් දෙදෙනා කලක සිටම වැලිමඩ නගරයට හා අවට කුඩා නගරවල හෝටල් හා රස කැවිලි අලෙවි සැල්වලට කළු දොදොල් ඇතුළු රස කැවිලි නිෂ්පාදනය කර අලෙවි කරනු ලැබේ. මෙයින් එක් මිතුරකු නිෂ්පාදනය කරන දොදොල් තද කළු පාටින් යුක්ත වන අතර අනෙක් මිතුරාගේ දොදොල්වලට කිසිදු වර්ණයක් මුසු නොකර සීනි කළු කිරීමෙන් පමණක් ලැබෙන කළුත් නැති දුඹුරුත් නැති වර්ණයක් ගෙන තිබුණි. 

මෙසේ නිපදවන දොදොල් එකම දින එකම වේලාවක වැලිමඩ නගරයේ රසකැවිලි අලෙවිසල්වලට ගෙනවිත් තිබේ. අදාළ ව්‍යාපාරිකයා තමන් මිලට ගත් දොදොල් සඳහා මිතුරන්ට මුදල් ගෙවන අතරේ දෙන්නම එකවර මුණගැසීම හොඳයි. කොහොමද දෙන්නගේ දොදොල් වලට පාට දෙකක් එන්නේ යැයි විමසා ඇත. කළු දොදොල් නිපදවන්නා තමන් කිසිදු වර්ණ කාරකයක් මිශ්‍ර නොකරන බවත් පවසමින් අනෙක් මිතුරාගේ දොදොල් පිළිබඳව යම් යම් අඩුපාඩු නිසා මෙසේ වර්ණය අඩුව ඇති බවත් පවසා තිබේ. 

මිතුරා තම දොදොල්වල තත්ත්වය හෑල්ලු කිරීමෙන් කෝපයට පත්ව ‘මම නම් දොදොල් හැඳිගාන තාච්චියේ කබලේ පිට පැත්තේ අඩියේ බැඳෙන දැලි මිශ්‍ර නොකිරීම නිසා ස්වභාවික වර්ණයෙන් යුක්ත බවත් දොදොල් හැඳිගාන විට දැලි මිශ්‍ර වතුර එක් වීමෙන් තද කළු පාටක් ඇති වන බව කියා මිතුරාගේ රහස හෙළි කර ඇත. කලු දොදොල් වර්ණ ගන්වන ගුරු මුෂ්ඨිය හෙළිවීමෙන් කෝපයට පත් මිතුරා ලැජ්ජාවට පත්ව අනෙක් මිතුරාට බැණ වදිමින් වසර ගණනක් පැවති මිතු දහමට ද තිත තබා පිටව ගිය බව පැවසේ.