(හසලක සුනිල්)
උගුලෙන් බැරි නම් හබකෙන් යැයි කියමින් තරුණයකුට වැලඳී තිබූ අමනුෂ්‍ය දෝෂයක් කට්ටඩි මහතකු විසින් සුවපත් කළේ ඇසූ දුටුවන්ට අදහාගත නොහැකි අන්දමේ ශාන්තිකර්මයකිනි.

හැට නව වැනි වියේ පසුවෙන හදි හූනියම් බලි තොවිල් කරන මෙම කට්ටඩි මහතා තැනට සුදුසු නුවණ භාවිතා කරමින් තමන් කරා එන රෝගීන් සුවපත් කිරීමට දක්ෂයකු බව ඔහු පදිංචිව සිටි ගමට රහසක් නොවීය.

මෙදින පෙරවරුවේ ත්‍රිරෝද රථයකින් කට්ටඩි මහතා හමුවට අසල ගමක පදිංචි 24 හැවිරිදි තරුණයකු සමග පැමිණියේ මවක් සහ පියෙකි. ඔවුන් රථයෙන් බැස කට්ටඩි මහතා වෙත ගොස් ආගිය තොරතුරු කතා කිරීමෙන් පසුව මව පැවසුවේ, ඒ වන විටත් නිහඬව බලාගත් අත බලාගෙන නිහඬව සිටි තම පුතා දැනට සති කීපයක සිට මෙලෙස සිටින බවත්, ප්‍රියතාවයකින් ආහාර පාන නොගන්නා බවත් නිවැසියන්, හිත මිතුරන් හෝ ඥාතීන් හෝ සමග කතා බහක් නොකර යම් යම් දේ තනිවම කියවන බවත්ය.

තරුණයා පරීක්ෂා කර බැලූ කට්ටඩි මහතා පැවසුවේ, මොහුට වැලඳී ඇත්තේ අමනුෂ්‍ය දෝෂයක් බවත්, මෙය ඉවත් කිරීමට තොවිලයක් නැටිය යුතු බවත්ය.

නියමිත දින සවස කට්ටඩි මහතා බෙරකරුවකු සහ තවත් ගෝලයකු ද සමග රෝගියා සිටි නිවසට පැමිණියේය. ඒ වෙන විටත් නිවසේ රැස්ව සිටි ගමේ තරුණ පිරිසගේ ද සහයෝගයෙන් මල් යහනක්, පහන් පැලක් සහ පිදේනි සකස් කොට රාත්‍රී 9ට පමණ තොවිලය ආරම්භ කළේ ඉදිකළ මල් යහන අසල බිම එළා තිබූ පැදුරේ රෝගියා හාන්සිකරවා තබමිනි.

බෙරකරුවාගේ ළයාන්විත බෙර හඬ තාලයට පාද තබමින් ආශිර්වාද ගීත ගයමින් වරෙක අසල සිටියවුන් බිය ගැන්වෙන අයුරින් යක්ෂයන්ට, ප්‍රේතයන්ට, කුම්භාණ්ඩයන්ට සැර පරුෂ වචනයෙන් අමතමින් නටමින් ගයමින් අතේ රැඳි ගිනි පන්දමට දුම්මල ගසමින් නරඹන්නන්ගේ නෙත් සිත් පිනවන අයුරු ඇඳුමකින් සැරසී සිටි කට්ටඩි මහතා තොවිලය කරගෙන ගියේය. රාත්‍රී ගෙවී අලුයම හතරේ කණිසම ද නිවසේ හෝරා යන්ත්‍රයෙන් නාද විය. එහෙත් ආතුරයාගෙන් කිසිදු ප්‍රතිචාරයක් නැත. ඔහුට මේ බෙර හඬ හෝ යාතිකා ගැන වගේ වගක් නැත. ඔහු හොඳට හරිබරි ගැහී ගුලිවී නිදාගෙන සිටී.

යමක් වැරදී ඇති බවක් කට්ටඩි මහතාට වැටහුණි. උගුලෙන් බැරි නම් හබකෙන් මේක ගොඩ දාන්න ඕනෑ යැයි තමාටම කියාගත් කට්ටඩි මහතා, තොවිලය මදකට නතර කොට ඒ වන විටත් මත් වතුරින් මත් වී සිටි තරුණයන් දෙදෙනකු දැක පසෙකට කැඳවා ඔවුන්ට පවසා කාටත් නොපෙනෙන ලෙස යම් මුදලක් ඔවුන්ගේ අත මිට මෙළවීය. ලද උපදෙස් අනුව පිටතට ගොස් විනාඩි කිහිපයකින් පැමිණ එම තරුණයන් දෙදෙනා එතෙක් ගොරවමින් පැදුරේ නිදාගෙන සිටි තරුණයා අවදි කරවාගෙන කළුවරේම පසෙකට කැඳවාගෙන ගොස් නැවත පෙර පරිදිම බිම තිබූ පැදුරේ හාන්සි කරවීය.

පෙර පරිදි නැවත තොවිලය ආරම්භ වුවත් එහිදී කට්ටඩි මහතාගේ මුවින් පිටවූයේ ළයාන්විත ආශිර්වාද ගීත නොව, නැගලා යන ගීතය. එම ගීතවලට සරිලන සේ බෙරකරුවා ද බෙරය වයන්නට විය. අසල සිටි තරුණයෝ ද අත්පොළසන් දෙමින් ගීත ගයමින් නටන්නට වූහ. තොවිලය නැරඹීමට පැමිණි පිරිසට මෙය අමුතුම තාලේ තොවිලයක් බවට පත්වී ඇති බව වැටහුණි. ගතවූයේ විනාඩි කීපයකි. එතෙක් බිම පැදුරේ වැතිරී සිටි රෝගී තරුණයා ක්ෂණිකව නැගී සිට අත්පොළසන් ගසමින් තොවිල්පොළට පැමිණ ගයන්නටත්, නටන්නටත් පටන් ගත්තේ අසල සිටි සැවොම පුදුමයට පත් කරවමිනි.

කට්ටඩි මහතාගේ හිතෛෂිවන්තයන් බවට පත්ව සිටි තරුණයෝ දෙදෙනා විනාඩි පහළවෙන් පහළවට නටමින් ගයමින් සිටි අමනුෂ්‍ය දෝෂය වැලඳී සිටි තරුණයා පිටතට රැගෙන ගොස් නැවත නැටුම් මණ්ඩපයට රැගෙන විත් දැමීමට කටයුතු කළහ. පැයක පමණ කාලයකින් පසු මෙම තොවිලය හමාර විය.

තොවිලය හමාරවීමෙන් පසු ගමේ පිරිස හා පවුලේ අය එක්ව ස්ථානය පිරිසිදු කිරීම ආරම්භ කළහ. රෝගී තරුණයා අනෙක් අයට වඩා කඩිසරෙන් එම කටයුතුවල නිරතවීම ගමේ අයටත් පවුලේ අයටත් සතුටට කාරණයක් විය. තොවිලය හමාරවීමෙන් ලද ගාස්තුව ද රැගෙන කට්ටඩි මහතා පිටත්වෙන්න සූදානම් වෙන විට ඔහුට උදව් කළ තරුණයන් දෙදෙනා ඔහු ළඟට ගොස් විමසුවේ ‘කොහොමද ඔබතුමා මේ මල්ලී හොඳ කළේ’ කියාය. ‘ඔව්වා හැමෝටම කරන්න පුළුවන් තොවිල් නොවෙයි ළමයිනේ. උගුලෙන් බැරි නම් හබකෙන් හරි අමනුෂ්‍ය දෝෂ විතරක් නොවෙයි ඕනම දෝෂයක් දුරු කරන කට්ටඩියෙක් මම’ යැයි කියමින් ඔහු යන්නට ගියේ බෙරකරුවා හා ගෝලයා ද සමගිනි. 

එතැන් සිට තරුණයා ද සුවපත් වූ බව සඳහන් වේ.