චීනයේ වුහාන් නගරයේ මිලියන 11ක් පමණ වන සියලුම ජනතාව කොවිඩ් - 19 සඳහා පරීක්ෂා කිරීමට සැලසුම් සකස් කර ඇති බව එරට රාජ්‍ය මාධ්‍ය පවසයි.  වුහාන් හි සියලුම දිස්ත්‍රික්ක වලට මේ බව දැනුම් දී ඇති අතර පරීක්ෂණ සිදුකළ හැකි ආකාරය පිළිබඳ දැනුම් දෙන ලෙස වුහාන් ප්‍රාන්ත පරිපාලනය ඔවුන්ට දන්වා තිබේ.

මේ සම්බන්ධයෙන් දින 10ක පරීක්ෂණ සැළැස්මක් ඉදිරිපත් කරන ලෙස ද ඔවුන්ට දන්වා ඇත. වයිරසය මුලින්ම ආරම්භ වූ වුහාන් ප්‍රාන්තයේ පසුගිය සති අන්තයේ රෝගීන් හය දෙනකු වාර්තා වීමෙන් පසු මෙම පියවර ගෙන ඇතැයි වාර්තා වේ.

සෑම දිස්ත්‍රික්කයකම ජනගහනය සහ රෝග ව්‍යාප්තිය මත පදනම්ව මෙම සැලැස්ම ඉදිරිපත් කළ යුතු අතර වයස්ගත පුද්ලයන් සහ ජනාකීර්ණ ප්‍රදේශ වලට ප්‍රමුඛත්වය දිය යුතු බවට උපදෙස් දී තිබේ.

කෙසේ වෙතත් සමහර සෞඛ්‍ය විශේෂඥයින් සඳහන් කර ඇත්තේ මෙය දුෂ්කර සහ විශාල මුදලක් වැය වන ක්‍රියාවලියක් වනු ඇති බවයි. ඒ වෙනුවට වෛද්‍ය සේවකයින්, අවදානමට ලක්විය හැකි පුද්ගලයින් සහ රෝගීන්ගේ සමීප සබඳතා ඉලක්ක කර පරීක්ෂණ පැවැත්වීම ප්‍රමාණවත් බවද ඔවුහු පවසති.

වුහාන් හි දැනටමත් මිලියන 3 - 5 ත් අතර ජනතාවක් පරීක්ෂා කර ඇති හෙයින් ඉතිරිය පරීක්ෂා කිරීම ගැටලුවක් නොවන බවද තවත් සමහර විද්වතුන් පවසා ඇත.

සති 11 තිස්සේ වසා දමා තිබූ වුහාන් නගරය අප්‍රේල් 08 වනදා සිට ක්‍රම ක්‍රමයෙන් විවෘත කිරීම ඇරඹිණ. පාසැල්, ව්‍යාපාර සහ පොදු ප්‍රවාහණ ආරම්භ වූ අතර ජන ජීවිතය යථා තත්ත්වයට පත්වෙමින් තිබිණ. එහෙත් වුහාන් හි නේවාසික ස්ථානයකින් කොරෝනා රෝගීන් 06 දෙනකු වාර්තා වීමෙන් පසුව වුහාන් බලධාරීන් නැවත රෝගය පැතිරීමේ අවධානම සම්බන්දව සැලකිලිමත් වීමට පටන්ගෙන තිබේ.

චීනයේ මේවනවිට කොරෝනා රෝගීන් 82,919 ක් වාර්තා වන අතර මරණ 4 633 ක් සිදුවී තිබේ.

(බීබීසී ඇසුරිණි - 085)