ගතවුණු දින 17 ඇතුළත කිසිදු කොරෝනා ආසාදිතයකු හමුනොවීමත්, රෝහල්ගතව සිටි සියලු ආසාදිතයන් පූර්ණ සුවය ලබා රෝහල්වලින් පිටව යෑමත් සමඟ නවසීලන්තය නව කොරෝනා වයිරස වසංගතය හෙවත් ‘කොවිඩ්-19’ ගෝලීය වසංගතයෙන් තොර රටක් යැයි නවසීලන්ත අග්‍රාමාත්‍ය ජසින්ඩා ආඩෙන් අද (8) ප්‍රකාශ කළාය.

මිලියන පහක ජනගහනයක් වෙසෙන නවසීලන්තය නව කොරෝනා වයිරසයේ ව්‍යාප්තිය පාලනය කිරීම සඳහා දැඩි සීමා පැනවූ ලොව රටවල් කිහිපය අතරින් එකක් වන අතර වයිරසයේ පාලනය සඳහා පැනවූ සීමා ලිහිල් කරන බව එරට සෞඛ්‍ය බලධාරීහු ද ප්‍රකාශ කළහ.
වයිරසය ආසාදනය වී රෝහල්ගතව ප්‍රතිකාර ලබමින් සිටි අවසන් රෝගියා ද රෝහලෙන් පිටව ගිය බවත් එම නිසා රට සාමාන්‍ය තත්ත්වයට පත් කිරීම සඳහා රටම වසා දැමූ ‘ලොක්ඩවුන්’ සීමා ඉවත් කරන බවත් සෞඛ්‍ය බලධාරීහු කීහ.

කොරෝනා වයිරසයේ ව්‍යාප්තිය පාලනය කිරීම සඳහා කිසිදු පියවරක් වෙනස් නොකරන බවත් එසේ වුවත් වයිරසයෙන් දැඩි බලපෑමක් එල්ල වූ ආර්ථිකය නැවත ගොඩනගන බවට පොරොන්දු වන බවත් පුවත්පත් සාකච්ඡාවකදී විශේෂ නිවේදනයක් කරමින් නවසීලන්ත අග්‍රාමාත්‍යවරිය ඊයේ කීවාය.

‘‘අපි සමාජයෙන් වයිරසය ආසාදනය වීම තුරන් කරලා තියෙන්නේ. අපි අපේ වැඩේ කළා. එය සුවිශේෂී ජයග්‍රහණයක්. අපි සීමා සියල්ල ඉවත් කරනවා. එය අද (සඳුඳා) මධ්‍යම රාත්‍රියේ සිට ක්‍රියාත්මක’’ යැයි ද නවසීලන්ත අග්‍රාමාත්‍යවරිය පැවැසුවාය.

‘‘නවසීලන්තයට ස්තූතියි’’ යැයි අවසාන වශයෙන් ප්‍රකාශ කරන බව ද නවසීලන්ත අග්‍රාමාත්‍යවරිය ප්‍රකාශ කළාය.
නවසීලන්තයේ අවසාන කොරෝනා ආසාදිතයා ඕක්ලන්ඩ්හි කාන්තාවකි.

මේ අනුව කඩසාප්පු, අවන්හල්, ආපනශාලා, කාර්යාල සියල්ල විවෘත කෙරෙන අතර කායික එසේත් නැතිනම් සමාජ දුරස්ථභාවය පවත්වාගැනීම අත්‍යවශ්‍ය නොවේ. එහෙත් මෙතෙක් අනුගමනය කළ සෞඛ්‍යාරක්ෂිත ක්‍රියාමාර්ග පිළිපදින්නැයි නවසීලන්ත බලධාරීහු එරට ජනතාව උනන්දු කරති.

කෙසේ නමුත් තවදුරටත් දේශසීමා වසා තැබෙන බව ද නවසීලන්ත අග්‍රාමාත්‍යවරිය ඊයේ පැවැති මාධ්‍ය හමුවේදී කීවාය.
චීනයේ හුබෙයි පළාතේ වූහාන් නගරයෙන් නව කොරෝනා වයිරසය ව්‍යාප්ත වීමට පටන් ගැනීමෙන් පසු සිය රට තුළ වයිරසය නැතැයි ප්‍රකාශයට පත් කළ මුල්ම රටවල් අතළොස්ස අතරට ද නවසීලන්තය මේ වනවිට එක්ව ඇත.

තව සතියක කාලයක් ආසාදිතයන් හමුවන්නේදැයි විමසිල්ලෙන් සිටින බවත්, එසේ ආසාදිතයකු හමුනොවුණොත්, ලබන 15 වැනිදා ‘කොවිඩ්-19’ වයිරසය තුරන් කළ ලොව පළමු රට ලෙස නිල වශයෙන් නවසීලන්තය නම් කිරීමට පියවර ගන්නා බවයි

නවසීලන්තයෙන් පළමු ‘කොවිඩ්-19’ ආසාදිතයා වාර්තා වූයේ පෙබරවාරි 28 වැනිදා වන අතර, අවසන් වරට ‘කොවිඩ්-19’ ආසාදිතයකු වාර්තා වූයේ පසුගිය මැයි 22 වැනිදාය.

නවසීලන්තයෙන් වාර්තා වූ සමස්ත කොරෝනා ආසාදිතයන්ගේ ගණන 1,504ක් වූ අතර එරටින් වාර්තා වූ සමස්ත කොරෝනා ආසාදිත මරණ ගණන 22කි. වයිරස ආසාදිතයන් හඳුනා ගැනීමට නවසීලන්තය පී.සී.ආර්. පරීක්ෂණ 2,94,848 ක් සිදු කළේ යැයි එරට සෞඛ්‍ය බලධාරීහු ප්‍රකාශ කළහ.

රෝහල්ගතව ප්‍රතිකාර ලබමින් සිටි අවසන් ‘කොවිඩ්-19’ ආසාදිතයා සුවය ලබා රෝහලෙන් පිටවී ගොස් ඇත්තේ පසුගිය සෙනසුරාදා (6) දිනයේය. ඉන්පසු මෙතෙක් ආසාදිතයකු වාර්තා වී නැත.

චීනයේ හුබෙයි පළාතේ වූහාන් නගරයෙන් පසුගිය දෙසැම්බර් මාසයේදී ව්‍යාප්ත වීමට පටන් ගත් නව කොරෝනා වයිරසය මේ වනවිට රටවල් හා පරිපාලන ප්‍රදේශ 220කට අධික සංඛ්‍යාවකට ව්‍යාප්ත වී ගොස් ඇත. 

මේ වනවිට ලොවපුරා කොරෝනා ආසාදිතයන්ගේ ගණන 71,02,957ක් වන අතර ගෝලීය මරණ සංඛ්‍යාව 4,06,300 ඉක්මවා ගොස් ඇත.
කොරෝනා වයිරසය ආසාදනය වී සුව වූ සමස්ත ගණන 34,66,532කි.


ඒ.එෆ්.පී./රොයිටර්

055