(පැතුම් දර්ශන)

අවුරුදු 14ක් වයසැති පාසල් දැරියකට ලිංගික අතවර කළ යුද හමුදා කපිතාන්වරයෙකු හොරොව්පොතාන නගරය ආසන්නයේ පිහිටි තානායම් පාර ප්‍රදේශයේදී සැකපිට  අද(09) සවස අත්අඩංගුවට ගත් බව හොරොව්පොතාන පොලිසිය කියයි.

හොරොව්පොතාන තානායම් පාර ප්‍රදේශයේ පාලු ස්ථානයක නිල ඇඳුමෙන් සැරසුනු පාසල් දැරියක හා සිවිල් ඇඳුමක් ඇඳගත් පුද්ගලයකු අශෝභන ලෙස හැසිරෙන බවට ළමා හා කාන්තා කාර්යංශයට ලැබුණු තොරතුරක් අනුව පොලීසිය එම සැකකරු අත්අඩංගුවට ගෙන ඇත.

සැකකරු හොරොව්පොතාන අලපත්වැව ප්‍රදේශයේ පදිංචි දෙදරු පියකු බව පොලීසිය වැඩිදුරටත් කියයි.

මොහු නෙළුමිවැව, ජනකපුර යුද හමුදා කඳවුරේ සේවය කරමින් සිටියදී නිවාඩු ලබා පැමිණ ඇති බවට අනාවරණය වී තිබේ.

දැරිය පාසල නිමවීමෙන් පසු අනුරාධපුර හොරොව්පතාන බස් රථයක නැගී නිවස  බලා එමින් සිටියදී  එම බස් රථයෙන්ම පැමිණි සැකකාර කපිතාන්වරයා දැරිය රවටා ඇති බව පොලිසිය පවසයි. 

නීත්‍යානුකූල භාරකාරත්වයෙන් අපහරණය කර ලිංගික අතවර සිදු කිරීමේ චෝදනාව යටතේ සැකකරුට එරෙහිව හෙට (10) කැබිතිගොල්ලෑව මහෙස්ත්‍රාත් අධිකරණයේදී  නඩු පැවරීමට නියමිතය.