(ටෝනි කරුණානායක)

ගම්පහ යක්කල ප්‍රදේශයේ දි කාන්තාවක අපයෝජනය කර ඇගේ රන්මාලය කොල්ලකෑ බවට වන චෝදනා දෙකට වරදකරු වූ විත්තිකරුට බරපතල වැඩ ඇතිව වසර 17 ක සිරදඬුවමක් ගම්පහ මහාධිකරණ විනිසුරු නිමල් රණවීර මහතා අද(30) නියම කළේය.

චෝදනා දෙකට රුපියල් 25,000 ක දඩයක් සහ අගතියට පත් කාන්තාවට රුපියල් ලක්ෂ 2ක වන්දියක් ගෙවීමට ද නියම වු අතර එම දඩ සහ වන්දි මුදල් නොගෙවන්නේ නම් තවත් මාස 23 ක සිරදඬුවම් නියම කෙරුණි.

වසර 10 කට පසු මෙම සිර දඬුවම ලද්දේ, ගනේමුල්ල කුඩාබොල්ලත පදිංචි ඩි.ජි.චාමික රවි සාන්ත නැමැත්තා ය.

2010ජුලි මස 07 වෙනිදා හෝ ඊට ආසන්න දිනයක දී යක්කල පිටිවල්ගොඩ දී එවකට 47හැවිරිදි එක් දරු මවක
වු ඇගලුම් කම්හල් සේවිකාවක අපයෝජනය කර ඇයගේ ගෙල බැඳි රන් මාලය කොල්ලකෑම විත්තිකරුට එරෙහිව නීතිපති ගොනු කර තිබූ චෝදනා විය.

අගතියට පත් කාන්තාව කඩවත ප්‍රදේශයේ ඇගලුම් කම්හලක සේවය කර නිවසට වෙල්යායක් හරහා පයින් ගමන්
කරමින් සිටි අවස්ථාවේ විත්තිකරු අපයෝජනය කර තිබූ බවට මහාධිකරණයේදී කරුණු අනාවරණය විය.