සෙලාන් බැංකුව නිල බැංකු හා ලීසිං හවුල්කරු ලෙස කටයුතු කළ Colombo Motor Show 2024’ ප්‍රදර්ශනය පසුගියදා සාර්ථක ලෙස නිමාවට පත් විය. සෙලාන් බැංකුව මෙම ප්‍රදර්ශනය සමග අත්වැල් බැඳගත් 7 වැනි අවස්ථාව මෙයයි. 

 කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේදී පසුගියදා පැවති මෙම ප්‍රදර්ශනය නැරඹීමට 60,000 කට අධික පිරිසක් පැමිණියහ. රථවාහන ක්ෂේත්‍රයේ නවතම ප්‍රවණතා දැකගැනීමට නරඹන්නන්ට අවස්ථාව සලසා දුන් එම ප්‍රදර්ශනයේදී විදුලි වාහන කෙරෙහි වැඩි අවධානයක් යොමු වී තිබුණු අතර එය රථවාහන කර්මාන්තයේ අනාගත දිශානතිය මැනැවින් සංකේතවත් කළ අවස්ථාවක් ලෙස හැඳින්විය හැක. 

මෙහිදී විශේෂයෙන් 'Fat Track' ලීසිං පහසුකම සම්බන්ධයෙන් ජනතාව දැනුවත් කිරීමට සෙලාන් බැංකුව කටයුතු කළේ ය. මෙම ලීසිං පහසුකම මගින් ගනුදෙනුකරුවන්ට පැය 24 ක් ඇතුළත තමන් සිහින දකින වාහනය (විදුලි හෝ සාමාන්‍ය වාහන) තමන් සතු කරගැනීමට අවස්ථාව හිමි වේ. මෙහිදී නරඹන්නන්ට ලීසිං පහසුකම් ලබාගැනීමේදී අයකරනු ලබන සේවා ගාස්තු සඳහා සියයට 50 ක වට්ටමක්ද පිරිනමන ලදී. මීට අමතරව මෙහිදී සෙලාන් බැංකුව හඳුන්වා දී ඇති නවතම සේවාවක් වන, ගනුදෙනුකරුවනට මුදල් හදිසියකදී ඉතාමත් පහසුවෙන් මුදල් ලබා ගැනීමට අවස්ථාව සලසා දෙන Speed Drive Instant Cashපහසුකම පිළිබඳවද නරඹන්නන් දැනුවත් කරන ලදී. 

Asia Exhibition and Convention (පුද්.) සමාගම මගින් අඛණ්ඩව 18 වැනි වරටත් සංවිධානය කරන ලද Colombo Motor Show 2024 ප්‍රදර්ශනය, රථවාහන අමතර කොටස් සහ උපාංග ඇතුළු විවිධ භාණ්ඩ හා සේවා ඇතුළත් ප්‍රදර්ශන කුටි 200 කට අධික සංඛ්‍යාවකින් සහ රථවාහන ක්ෂේත්‍රයට සම්බන්ධ සජීවී ඉසව් රැසකින් සමන්විත විය. ප්‍රදර්ශනය භූමියේදී පවත්වන ලද යතුරු පැදි සහ මෝටර් රථ ධාවන ඉසව් සම්බන්ධයෙන් තරුණ තරුණියන් අතර විශාල උනන්දුවක් දක්නට ලැබිණි. 

තවද මෙහිදී නරඹන්නන්ට සෙලාන් බැංකුවේ නියෝජිතයන් සමග සම්බන්ධ වෙමින් සෙලාන් ලීසිං සේවා පිළිබඳව මෙන්ම ක්‍රෙඩිට් කාඞ්පත් සහ ඉතුරුම් සේවා ඇතුළු තවත් සේවා රාශියක් පිළිබඳව තොරතුරු දැනගැනීමට අවස්ථාව හිමි විය.