කොළඹ කොටස් හුවමාරුවේ ඊයේ දිනයේදී ගනුදෙනු අවසානයේදී එහි සියලු‍ දර්ශක කැපී පෙනෙන ලෙස ඉහළ යාමක් සිදු විය. ඒ අතරින් සියලු‍ කොටස් මිල දර්ශකය මෙතෙක් වාර්තා වූ ඉහළම අගයට පත්වෙමින් ඒකක 17,740.46ක් බවට පත්විය. 

මෙය පෙර දිනයට සාපේක්ෂව ඒකක 204.84ක එනම් සියයට 1.17ක ඉහළ යාමකි. එහිදී සමාගම් 146 ක කොටස් වටිනාකම් ඉහළ ගිය අතර සමාගම් 74ක වටිනාකම් පහත වැටුණි. මීට පෙර එම දර්ශකය වාර්තා කළ ඉහළම අගය ලෙස පසුගිය ජූනි 12 වැනිදා ඒකක 17,661ක් ලෙස සටහන් විය. එහෙත් 13 වැනිදා ඊශ්‍රායලය ඉරානයට එල්ල කළ ප්‍රහාරයත් සමගින් මැදපෙරදිග ඇති වූ අස්ථාවරත්වයේ බලපෑම හේතුවෙන් පසුගිය දින කිහිපයේදීම කොටස් වෙළෙදපොළ පහත වැටුණි. එසේම ඊයේ දිනය තුළ ස්ටෑන්ඩර්ඩ් ඇන්ඩ් පුවර්ස් ශ්‍රී ලංකා දර්ශකයත් ඒකක 5,265.35ක් දක්වා පෙර දිනයට සාපේක්ෂව ඒකක 46.34කින් එනම් සියයට 0.89කින් ඉහළ යාම සිදු විය. දිනය තුළ කොටස් මිලියන 427ක් ගනුදෙනු වූ අතර, දිනය තුළ සමස්ත පිරිවැටුම රුපියල් බිලියන 6.8ක් ලෙස සටහන් විය.