ශ්‍රී ලංකාවේ විවිධාංගීකරණය වූ සමාගම් සමූහයක් වන සන්ෂයින් හෝල්ඩින්ග්ස් ශක්තිමත් ස්ථාවර මූල්‍ය කාර්යසාධනයක් අඛණ්ඩව පවත්වා ගනිමින් 2026 මූල්‍ය වර්ෂයේ පළමු අර්ධයේදී සියලුම ව්‍යාපාරික අංශ හරහා රුපියල් බිලියන 32.3 ක ඒකාබද්ධ ආදායමක් වාර්තා කර ඇත. එය පසුගිය වසරේ එම කාල පරිච්ඡේදයට සාපේක්ෂව සියයට 7-4 ක වර්ධනයකි. 

සන්ෂයින් සමූහය ලබා ගත් මෙම ඉහළ වර්ධනයට සුව සේවා අංශය විශාල දායකත්වයක් ලබා දුන් අතර, එය මුළු ආදායමෙන් සියයට 53.7 කි. මේ අතර පාරිභෝගික අංශය සියයට 30.2 ක් ද කෘෂි ව්‍යාපාර අංශ සියයට 16.1 ක් ද වශයෙන් සමූහයේ මුළු ආදායමට දායක විය. සමාලෝචනයට ලක් කරන ලද කාල පරිච්ඡේදයේදී සමූහයේ දළ ලාබය පසුගිය වසරට සාපේක්ෂව සියයට 12.9 කින් රුපියල් බිලියන 10.3 ක් දක්වා ඉහළ ගිය අතර, දළ ලාබ ආන්තිකය පදනම් ලකුණු 153 (bps) කින් සියයට 31.9 ක් දක්වා වර්ධනය විය.

සමූහයේ පොලී සහ බදු පෙර ඉපැයීම් (EBIT) පසුගිය වසරට සාපේක්ෂව සියයට 18.6 කින් රුපියල් බිලියන 5.5 ක් දක්වා ඉහළ ගියේය. සුව සේවා අංශයෙහි EBIT හි සියයට 16.7 ක පහත වැටීමක් තිබියදීත් කෘෂි ව්‍යාපාර සහ පාරිභෝගික අංශවල ශක්තිමත් කාර්යසාධනය මෙම වර්ධනයට හේතු විය. කෘෂි ව්‍යාපාර සහ පාරිභෝගික අංශවල ශක්තිමත් ක්‍රියාකාරීත්වය හේතුවෙන් 1HFY26 දී සමස්ත EBIT වෙනස පසුගිය වසරේ එම කාල පරිච්ඡේදය හා සැසඳීමේදී සියයට 15.4 සිට සියයට 17.0 දක්වා ඉහළ ගිය අතර එය සුව සේවා අංශයේ පහත වැටීම පියවා ගැනීමට උපකාරී විය.

සමූහය ලබා ගත් මෙම මූල්‍ය ප්‍රතිඵල පිළිබඳව අදහස් දක්වමින් සන්ෂයින් සමූහයේ ප්‍රධාන විධායක නිලධාරී ශ්‍යාම් සතාසිවම් මහතා මෙසේ පැවසුවේය. “අපගේ විවිධාංගීකරණය වූ ව්‍යාපාර ආකෘතිය අපට ප්‍රධාන ශක්තියක් වන අතර, එය වෙනස් වන වෙළෙඳපොළ තත්වයට අනුවර්තනය වීමට අපට උපකාරී කරනවා. 1 HFY26 දී අප ලබා ගත් වර්ධනය මගින් පෙන්නුම් කරන්නේ ඵලදායී ලෙස සැලසුම් කිරීමට සහ ක්‍රියා කිරීමට අපට ඇති හැකියාවයි.” 

සමාලෝචනයට ලක් කරන ලද කාල පරිච්ඡේදයේදී සමූහයේ සුව සේවා අංශය රුපියල් බිලියන 17.3 ක ආදායමක් වාර්තා කර ඇති අතර, එය පසුගිය වසරේ අදාළ කාල පරිච්ඡේදයට සාපේක්ෂව සියයට 7.4 ක වර්ධනයකි. මෙම වර්ධනයට ඖෂධ බෙදාහැරීම, වෛද්‍ය උපකරණ, ෆාමසි සහ ඖෂධ නිෂ්පාදනයෙන් ලැබෙන ආදායම ඇතුළත් විය. ඖෂධ සහ වෛද්‍ය උපකරණ අංශවල සහායෙන් ඖෂධ බෙදාහැරීමේ ව්‍යාපාරය වර්ධනය වූ අතර, මෙමගින් සමූහය වැදගත් ආයතන සමඟ පවතින හවුල්කාරීත්ව සහ ප්‍රධාන නිෂ්පාදනවල වර්ධනය පෙන්නුම් කරයි. පාරිභෝගික වෙළෙඳාම් අංශයේ ආදායම පසුගිය වසරට සාපේක්ෂව සියයට 15.1 ක වැඩි වීමක් පෙන්නුම් කළේය.

2026 මූල්‍ය වර්ෂයේ පළමු අර්ධයේදී Healthguard Distribution හි ව්‍යාපාර ආකෘතියේ සිදු කළ වෙනස්කම් සහ නව උපායමාර්ගික හවුල්කාරීත්ව හේතුවෙන් Healthguard Distribution පසුගිය වසරට සාපේක්ෂව සියයට 29.5 ක ආදායම් වර්ධනයක් වාර්තා කළේය. මේ අතර 2025 වර්ෂය සඳහා රජයේ මිලදී ගැනීමේ ඇණවුම් ප්‍රමාණය අඩුවීම හේතුවෙන්, 1HFY26 දී සමූහයේ ඖෂධ නිෂ්පාදන ව්‍යාපාරය වන ලීනා මැනිෆැක්චරින් පෞද්ගලික සමාගමේ ආදායම පසුගිය වසරට සාපේක්ෂව සියයට 17-4ක පහළ යාමක් අත්විඳින ලදී.

පසුගිය වසරට සාපේක්ෂව අපනයන සහ දේශීය ව්‍යාපාර ඇතුලත් පාරිභෝගික අංශය 1HFY26 දී රුපියල් බිලියන 9.8 ක ආදායමක් වාර්තා කළ අතර, එය පසුගිය වසරට සාපේක්ෂව සියයට 1.0 ක සුළු වැඩි වීමකි. මේ අතර අදාළ කාල පරිච්ඡේදයේදී සන්නාමගත තේ සහ රසකැවිලි අංශය ඇතුලත් දේශීය ව්‍යාපාරවල ශක්තිමත් කාර්යසාධනය හේතුවෙන් එහි ආදායම පසුගිය වසරට සාපේක්ෂව සියයට 5.1 කින් වර්ධනය විය.

අපනයන ප්‍රමාණය වැඩි වුවද, සමස්ත අපනයන ආදායම පසුගිය වසරට සාපේක්ෂව සියයට 1.2 ක සුළු අඩුවීමක් පෙන්නුම් කළේය. එක්සත් ජනපද තීරුබදු වෙනස්වීම්වල ඍණාත්මක බලපෑම් හේතුවෙන් ඉහළ වටිනාකමක් ඇති තේ නිෂ්පාදන අලෙවිය පහත වැටීම මෙයට හේතු විය. තවද පාරිභෝගික අංශය මෙහෙයුම් වඩාත් කාර්යක්ෂමව පවත්වා ගෙන යාම සහ විචක්ෂණශීලීව වියදම් කළමනාකරණය කිරීම හේතුවෙන් 2026 මූල්‍ය වර්ෂයේ පළමු අර්ධයේදී එම අංශයේ EBIT වෙනස පසුගිය වසරේ එම කාල පරිච්ඡේදයේදී සියයට 5-1ට සාපේක්ෂව සියයට 7-8ක් දක්වා වර්ධනය විය.

සන්ෂයින් සමූහයේ කෘෂි ව්‍යාපාර අංශය නියෝජනය කරන වටවල වැවිලි සමාගම රුපියල් බිලියන 5.2 ක කැපී පෙනෙන ආදායමක් වාර්තා කළ අතර, එය පසුගිය වසරේ අදාළ කාල පරිච්ඡේදයට සාපේක්ෂව සියයට 21-9ක වර්ධනයකි. හිතකර වෙළෙඳපොළ තත්වය හේතුවෙන් පසුගිය වසරට සාපේක්ෂව සියයට 26-7කින් වර්ධනය වූ පාම් ඔයිල් ව්‍යාපාරයේ ශක්තිමත් කාර්යසාධනය මෙම ඉහළ ආදායම් වර්ධනයට මූලික වශයෙන් හේතු විය.