විමුක්ති එස්. රුද්‍රිගු

සූදු ක්‍රීඩාව සඳහා පිහිටුවනු ලබන නියාමන අධිකාරිය සුරැකුම්පත් හා විනිමය කොමිෂන් සභාව මෙන් වඩාත් ස්වාධීන කිරීමට ඒ සඳහා ඉදිරිපත් කර ඇති පනත් කෙටුම්පත සමාලෝචනය කළ යුතු බවත්, වත්මන් පනත් කෙටුම්පත යටතේ දේශපාලන මැදිහත්වීම්වලට ඉඩ තිබෙන බවත් ඇඩ්වොකාටා ආයතනය ප්‍රකාශ කළේය.

වත්මන් පනත් කෙටුම්පත මගින් මුදල් අමාත්‍යවරයාට අධික බලයක් ලැබෙන බවත්, එය නියාමකයාගේ ස්වාධීනත්වයට හානි කරන අතර සුදු ක්‍රීඩා කර්මාන්තයේ අඛණ්ඩතාව අනතුරේ හෙළන බවත් ඇඩ්වොකාටා ආයතනය පැවැසුවේය.

ඇඩ්වොකාටා ආයතනයේ සුදාරක ආරියරත්න මහතා ප්‍රකාශ කර සිටියේ සූදු ක්‍රීඩාව සඳහා ශක්තිමත් නියාමන රාමුවක් අවශ්‍ය බවයි. ඇතුළුවීම සහ පිටවීම නියාමනය කිරීමට, ඍණ බාහිරතා අවම කිරීමට, වෙළෙඳපොළ අඛණ්ඩතාව සහතික කිරීමට හා පාරිභෝගික අයිතිවාසිකම් ආරක්ෂා කිරීමට ශක්තිමත් නියාමන රාමුවක් අවශ්‍ය වන බව ආරියරත්න මහතා පැවැසුවේය.

එහෙත් වත්මන් පනත් කෙටුම්පත නිර්මාණය වී ඇති ආකාරයට එම ඉලක්ක ඉටුකර ගැනීමට නොහැකි බවද ඔහු ප්‍රකාශ කළේය. ඒ හේතුවෙන් ඉදිරිපත් වී ඇති සූදු නියාමන අධිකාරියේ පනත් කෙටුම්පත ඉල්ලා අස් කරගත යුතු බවත්, ජාත්‍යන්තර විශේෂඥයන්ගේ සහ සාමාන්‍ය ජනතාවගේ උපදේශන ලබා ගනිමින් පනත් කෙටුම්පත නැවත ඉදිරිපත් කළ යුතු බවත් ඔහු පැවැසුවේය.

නියාමන අධිකාරියේ සාමාජිකයන් පත් කිරීමට මුදල් අමාත්‍යවරයාට වත්මන් පනත් කෙටුම්පත අසීමිත බලයක් ලබා දෙන බවත්, අමාත්‍යවරයාගේ නාමයෝජනා සඳහා ආණ්ඩුක්‍රම ව්‍යවස්ථා සභාව විසින් අනුමැතිය ලබා ගැනීම අවශ්‍ය වන ලෙස එම විධිවිධාන සංශෝධනය විය යුතු බවත් ආරියරත්න මහතා ප්‍රකාශ කළේය.

වත්මන් පනත් කෙටුම්පතට අනුව නියාමන අධිකාරියේ අධ්‍යක්ෂ ජනරාල්වරයා පත් කරනු ලබන්නේ අමාත්‍යවරයා විසින් වන අතර, අධ්‍යක්ෂවරයා පත් කිරීමේදී මණ්ඩලය විසින් තරගකාරී ක්‍රියාවලියක් අනුගමනය කළ යුතු බවට එය වෙනස් විය යුතු යැයි ඔහු පැවැසුවේය. එසේම වත්මන් පනත් කෙටුම්පත යටතේ නීති සම්පාදනය කිරීමේ අසීමිත බලයක් අමාත්‍යවරයා සතුවන අතර, අධිකාරියට නියෝග ලබාදීමේ බලය ද අමාත්‍යවරයා සතුවන බව සුදාරක ආරියරත්න මහතා ප්‍රකාශ කළේය.