විමුක්ති එස් රුද්‍රිගු

මෙරටට 2030 වසර වනවිට වාර්ෂිකව ඇමෙරිකානු ඩොලර් මිලියන 500 ක සෘජු විදෙස් ආයෝජන ගෙන්වා ගැනීමේ ඉලක්කය සපුරා ගැනීමට අවශ්‍ය මූලික අඩිතාලම දැමීම සඳහා ප්‍රථම වරට සංවිධානය කරනු ලබන “2025 ෆින්ටෙක් සමුළුව”‍ එළැඹෙන සැප්තැම්බර් 24 හා 25 කොළඹ බණ්ඩාරනායක සම්මන්ත්‍රණ ශාලාවේදී පැවැත්වෙනු ඇතැයි එහි සංවිධායක මණ්ඩලය ප්‍රකාශ කළේය.
“මූල්‍ය ප්‍රවේශය හා ආර්ථික වර්ධනය නවෝත්පාදන හරහා වර්ධනය කිරීමෙන් ශ්‍රී ලංකාවේ ඩිජිටල් ආර්ථිකය බලගැන්වීම”‍ යන තේමාව යටතේ පැවත්වෙන මෙම සමුළුවට රටවල් 25 කින් 2000 කට වැඩි පිරිසක් සහභාගීවන බවද සංවිධායකයන් පැවැසුවේය. ඒ අතර ගෝලීය විශේෂඥයන් සහ කථිකයන් 150 කට වැඩි පිරිසක් සිටින බවද සංවිධායකයෝ ප්‍රකාශ කළහ.
ටෙක්සා පෞද්ගලික සමාගම, ඩිජිටල් ආර්ථික අමාත්‍යාංශය, මුදල්, සැලසුම් සහ ආර්ථික සංවර්ධන අමාත්‍යාංශය, හැටන් නැෂනල් බැංකුව සහ ශ්‍රී ලංකා ෆින්ටෙක් සංසදය සමඟින් එක්ව මෙම සමුළුව සංවිධානය කරයි.
සමුළුවෙන් වහාම මෙරටට ඇමෙරිකානු ඩොලර් මිලියන එකක සෘජු විදෙස් ආයෝජන ලැබෙනු ඇති බවත් පසුව තවත් මිලියන එකක සෘජු විදෙස් ආයෝජන ලැබෙනු ඇති බවත් සංවිධායකයෝ ප්‍රකාශ කළහ.
දෙදිනක් පුරා පැවැත්වෙන මෙම සමුළුව මෙරට ඩිජිටල් ආර්ථිකය නගා සිටුවීම සඳහා කරුණු හයක් පිළිබඳව අවධානය යොමු කරනු ඇතැයි සංවිධායකයෝ පැවැසූහ. සමුළුවේ නිල වෙබ් අඩවියද ඉකුත්දා නිල වශයෙන් දියත් කළේය.