කොටස් වෙළෙදපොළ ඊයේ (ජුලි 17) ගනුදෙනුවල දී නැවත වටයකින් පිරිහීමක් වාර්තා කළේය. කෙසේ වෙතත් පෙරවරුවේ තිබුණ කඩාවැටීම පාලනය කරගන්නට සමත් වූ අතර වෙළෙඳපොළ නතර කරන විට සුළු පසුබැසීමක් වශයෙන් සටහන්ව තිබුණි. අද දිනයේ ද ගනුදෙනු සඳහා ප්‍රමාණාත්මක ඉල්ලුමක් පවතිනු ඇතැයි විශ්වාස කෙරේ. සැලකිය යුතු ප්‍රමාණයකින් දර්ශක ඉහළ යා හැකිය. 
අද දිනයේ ද මූල්‍ය සහ බැංකු, අංශවලට අමතරව සංචාරක හා විනෝදාත්මක අංශයේ සමාගම්වලට වැඩි ඉල්ලුමක් පවතිනු දැකිය හැකිවිය. එම සමාගම්වල කොටස් මිල පහත අගයක තිබුණ අතර හුවමාරුවට අවස්ථාවක් වී තිබුණි. 
සියලු කොටස් මිල දර්ශකය ඒකක 18,876.11 ක් දක්වා සුළු පහත වැටීමක් පෙන්නුම් කළේය. එය කලින් දිනයට සාපේක්ෂව දර්ශක 8.11  ක පිරිහීමකි. එස් ඇන්ඩී පී ශ්‍රී ලංකා දර්ශකය 5,628.93 ක් වශයෙන් විය. පෙර දිනයට සාපේක්ෂව දර්ශක 39.19 ක අඩුවීමක් සේ  වාර්තා වේ. පිරිවැටුම රු. බිලියන 6.20 ක් ලෙස සඳහන්ය. වාර්තා වූ ගනුදෙනු ප්‍රමාණය 41,431 කි. හුවමාරු වූ කොටස් ප්‍රමාණය මිලියන 358.0 ක් විය. සමාගම් 122 ක කොටස් මිල ඉහළ ගියේය. කොටස් මිල පහත වැටුණ සමාගම් ගණන 122 කි.  විදේශ මිල දී ගැනීම් රු. මිලියන 170.6 ක් වන අතර විකිණීම් රු. මිලියන 285.7 කි. විදේශ වෙළෙඳාමෙන් රටට ශුද්ධ අවාසියක් ලැබී තිබේ.
ඇක්සස් ඉන්ජිනියරිං රු. මිලියන 545 ක්,  ජෝන් කීල්ස් රු. මිලියන 304 ක්, කිංග්ස්බරි  රු. මිලියන 265 ක්,   ජෙට්වින් සිම්පොනි රු. මිලියන 257 ක්,  කීල්ස් හොටෙල් රු. මිලියන 187 ක්, වී ඔන් රු. මිලියන 155 ක්,  බේරුවල රිසෝට් රු. මිලියන 124 ක්, හැටන් නැෂනල් නිෂ්ඡන්ද රු. මිලියන 120 ක්,  පෑන් ඒෂියා රු. මිලියන 110 ක්,  හැටන් නැෂනල් බැංකුව රු. මිලියන 100 ක්,  ඊස් ට්වෙස්ට් රු. මිලියන 95 ක්,  ඩිප් ප්‍රඩක්ට්  රු. මිලියන 94 ක්,  මාරවිල රිසෝට් රු. මිලියන 79 ක්, ඇල්ෆා රු. මිලියන 78 ක්,  අහුන්ගල්ල රු. මිලියන 71 ක්, ට්‍රාන්ස් රු. මිලියන 70 ක්, සහ  සෙන්ට්‍රල් ෆිනෑන්ස් රු. මිලියන 67 ක්,  වශයෙන් පිරිවැටුමට වැඩිම දායකත්වයක් දැක්විය.
නිරීක්ෂක