ශ්‍රී ලංකන් ගුවන් සේවයේ 46 වැනි සංවත්සරය අදට (01) යෙදී තිබේ. ඒ වෙනුවෙන් තම පාරිභෝගිකයන්ට විශේෂ වට්ටම් හා දීමනා එකතුවක් පිරිනැමීමට ශ්‍රීලංකන් ගුවන් සේවය කටයුතු යොදා ඇත. 

ශ්‍රී ලංකන් ගුවන් සේවය යනු ශ්‍රී ලංකාවේ සුන්දරත්වය හා සුහද සත්කාරය පිළිබඳ පණිවිඩය ලොව පුරා රැගෙන යමින්, රට වෙනුවෙන් ගෝලීය තානාපති භූමිකාවක් ඉටුකරන සුවිශේෂී සමාගමකි. සිය ඉතිහාසය පුරා සම්මාන හා ඇගයුම් රැසකින් පිදුම් ලබා ඇති ශ්‍රී ලංකන් ගුවන් සේවය ඉදිරියටත්, ජනතාව, සංස්කෘති හා ව්‍යාපාර යා කරමින් තම මෙහෙවර අඛණ්ඩව ඉටුකිරීමට සූදානමින් සිටී. 

මෙම සංවත්සර දීමනා මාලාව යටතේ, 2025 සැප්තැම්බර් 01 සිට 2025 සැප්තැම්බර් 05 දක්වා ශ්‍රී ලංකන් ගුවන් සේවයේ නිල වෙබ් අඩවිය හරහා ගුවන් ටිකට් පත් මිලදී ගන්නා පාරිභෝගිකයන්ට Business Class   ටිකට්පත් සඳහා සියයට 20 ක වට්ටමක්ද, Economy Class ටිකට්පත් සඳහා සියයට 15 ක වට්ටමක්ද හිමි වේ. එමෙන්ම ශ්‍රීලංකන් ගුවන් සේවයේ පාරිභෝගික ළැදියා වැඩසටහන වන FlySmiLes හි සාමාජිකයන්ට, ශ්‍රී ලංකන් ගුවන් සේවයේ 46 වන සංවත්සරය සංකේතවත් කරමින්  Bonus Miles  සියයට 46 ක් ලබාදීමටද කටයුතු යොදා ඇත. 
තවද සිය 46 වසරක ගමන් මග තුළ සමාගමේ සාර්ථකත්වය උදෙසා මහඟු‍ කාර්යභාරයක් ඉටු කළ කාර්ය මණ්ඩලයේ සාමාජික සාමාජිකාවන් ඇගයීමටද ගුවන් සේවය සැලසුම් කර තිබේ.