• යල් පැනගිය පිළිවෙත් හේතුවෙන් දින තුනකට රජයට රු.බි. 250 ක මුදලක් අහිමි වෙලා
• වසරකට බිලියන 36500 ක පමණ ආදායමක් අහිමි විය හැකියි

විමුක්ති එස්. රුද්‍රිගු

භාවිත කළ වාහන ආනයනය කිරීමේදී තක්සේරු කරන ආකාරය පිළිබඳව රාජ්‍ය මුදල් පිළිබඳ කාරක සභාව පසුගියදා පැවැති රැස්වීමකදී දැඩි කනස්සල්ල පළ කළේය. රේගුවේ යල් පැනගිය පිළිවෙත් හේතුවෙන් වසරකට රජයට රුපියල් බිලියන ගණනක බදු ආදායමක් අහිමි විය හැකි බවද රාජ්‍ය මුදල් පිළිබඳ කාරක සභාව ප්‍රකාශ කළේය.

කිලෝමීටර 50 ක පමණක් ධාවනය කර ඇති දින 5 ක් පැරැණි වාහන ඇතුළු සියලු‍ම වාහනවල වටිනාකම ආනයනයේදී සියයට 15 කින් අඩුකර ඇස්තමේන්තු කරන්නේ ඇයිදැයි එහිදී ආචාර්ය හර්ෂ ද සිල්වා මහතා ප්‍රශ්න කළේය. ශ්‍රී ලංකා රේගු අතිරේක අධ්‍යක්ෂ ජනරාල් සීවලි අරුක්ගොඩ එයට පිළිතුරු දෙමින් ප්‍රකාශ කර සිටියේ එයට හේතුව 2016 වසරේ වාහන ආනයනය කිරීම සම්බන්ධයෙන් නිකුත් වූ ගැසට් පත්‍රයක් බවත්, එහි සඳහන් උපදෙස් තවමත් යාවත්කාලීන වී නොමැති බවත්ය.

තක්සේරු කිරීමේදී වටිනාකම අඩුකිරීම සම්බන්ධයෙන් රේගුවට කිසිම මාර්ගෝපදේශයක් ලැබී නොමැති බවත්, තවමත් රේගුව 2016 නිකුත් කළ මාර්ගෝපදේශ පිළිපදින බවත් අරුක්ගොඩ මහතා එහිදී ප්‍රකාශ කළේය. එහිදී එම නිර්වචනය ආචාර්ය හර්ෂ ද සිල්වා මහතා අභියෝගයට ලක්කළ අතර ඔහු විමසා සිටියේ ඒ පිළිබඳව තවමත් ඉහළ බලධාරීන් දැනුවත් කර නොමැති ද යන්නයි.

එහිදී නැගුණු දිනකට වාහන කොපමණක් නිදහස් කරන්නේද යන ප්‍රශ්නයට පිළිතුරු දෙමින් අරුක්ගොඩ මහතා ප්‍රකාශ කර සිටියේ රේගුව දිනකට වාහන 200 ත් 300 ත් අතර ගණනක් නිදහස් කරන බවත් වාහන ආනයන සීමා ලිහිල් කිරීමෙන් පසුව මෙරටට මෝටර් වාහන 16,000 ක් පමණ ගෙන්වා තිබෙන බවත්ය.

අහඹු දත්ත මත පදනම්ව යල් පැනගිය පිළිවෙත් හේතුවෙන් දින තුනකට රජයට රුපියල් බිලියන 250 ක මුදලක් ආදායම ලෙස අහිමි වී තිබෙන බව එහිදී සඳහන් විය. එහිදී රාජ්‍ය මුදල් පිළිබඳ කාරක සභාව විමසා සිටියේ පාඩුව දිනකට රුපියල් බිලියන 100 කට වඩා වැඩි නම් රජයට වසරකට බිලියන 36500 ක පමණ ආදායමක් අහිමි විය හැකි බවයි.