( තිළිණි ද සිල්වා )

කොවිඩ් 19 පාලනය කිරීමෙන් පසු මෙරටට පැමිණෙන සංචාරකයන් වෙනුවෙන් නව පරිගණක යෙදවුමක් (app) හදුන්වා දීමට රජය පියවර ගෙන ඇතැයි සංචාරක අමාත්‍ය ප්‍රසන්න  රණතුංග මහතා කියා සිටී. 

තම උපදෙස් පරිදි තොරතුරු හා සන්නිවේදන තාක්ෂණ ආයතනය (ICTA) එම පරිගණක යෙදවුම නිර්මාණය කර තිබෙන අතර ඊට සංචාරක සංවර්ධන අධිකාරියට ප්‍රතිපාදන ලබා දී ඇත්තේ එක්සත් ජාතීන්ගේ සංවර්ධන වැඩ සටහන යැයිද සංචාරක අමාත්‍යවරයා වැඩිදුරටත් කීය .

මෙම නව පරිගණක යෙදවුම ආගමන විගමන දෙපාර්තමේන්තුවත් සමග හවුලේ ක්‍රියාත්මක කිරීමට අපේක්ෂා කරන බැවින්  එය භාවිතය සදහා අවශ්‍ය අනුමැතිය සදහා ඇමැති මණ්ඩලයට කැබිනට් පත්‍රිකාවක් ඉදිරිපත් කිරීමට අපේක්ෂා කරන බවද ඔහු සදහන් කළේය.

කොවිඩ් වසංගතය තත්ත්වය යටතේ ශ්‍රී ලංකාව සංචාරකයන් සදහා විවෘත කිරීමේදී ඔවුන් මෙරටට ගොඩ බැසීමට පෙර සිටම ඔවුන් පිළිබද සියළු තොරතුරු ලබා ගැනීම මෙම නව පරිගණක යෙදවුම හදුන්වා දීමේ අරමුණ බව සංචාරක අමාත්‍යවරයා වැඩිදුරටත්  පැවසීය .

දිවයිනට පැමිණෙන සංචාරකයන් සම්බන්ධ පී.සී.ආර් පරීක්ෂණ වාර්තා මෙන්ම ඔවුන් සංචාරය කරනු ලබන ප්‍රදේශ, ලැගුම්ගන්නා ස්ථාන හා කාල වකවානු පිළිබද දත්ත ලබා ගැනීම මෙමගින් කෙරෙන බව සංචාරක අමාත්‍යාංශය කියා සිටී.

මෙරටට පැමිණෙන සංචාරකයෙකුට වීසා අනුමැතිය ලබා දෙන අවස්ථාවේදී මෙම පරිගණක යෙදවුමට ඔහු හෝ ඇය සම්බන්ධ කර ගැනෙනු ඇත. එම සංචාරකයන්ට මෙරටට පැමිණීමට අනුමැතිය ලබා දෙන විටම ඔවුන් පිළිබදව සියළු තොරතුරු මෙරට සියලුම දිස්ත්‍රික්කවල මහජන සෞඛ්‍ය බළධාරීන් ඇතුළු අදාල අංශ වෙත ලබා දීමටද නියමිතයි.

මෙම පරිගණක යෙදවුමට මෙරට සංචාරක  ස්ථාන 4600ක හා පුරාවිද්‍ය වටිනාකම් සහිත සිද්ධස්ථාන 175ක තොරතුරු මෙම යෙදවුමට ඇතුලත් කිරීමට නියමිතය. මීට අමතරව මෙරටට පැමිණෙන සංචාරකයන්ට හදිසි අවස්ථාවකදී ඔවුන් නතර වී සිටින ප්‍රදේශයේ සංචාරක පොලීසිය සෘජුවම සම්බන්ධ කර ගැනීමටද මෙමගින් හැකියාව ලැබෙන බවද සංචාරක අමාත්‍යාංශය කියා සිටී.