• අගෝස්තු මාසයේදී ජංගම ගිණුමේ ශේෂය ඩොලර් මිලියන 368 ක්
• පළමු මාස 8දී මෙරට ජංගම ගිණුමේ ශේෂය ඩොලර් බිලියන 2.03 ක්
• වෙළෙඳ භාණ්ඩ ගිණුමේ හිඟය අගෝස්තු මාසයේදී ඩොලර් මිලියන 414.2 දක්වා අඩුවෙලා

විමුක්ති එස්. රුද්‍රිගු

අට වැනි මාසයටත් අඛණ්ඩව ජංගම ගිණුමේ අතිරික්තයක් පවත්වා ගනිමින් පසුගිය අගෝස්තු මාසයේදී ශ්‍රී ලංකාවේ විදේශ අංශය අඛණ්ඩව ශක්තිමත් වී ඇතැයි ශ්‍රී ලංකා මහ බැංකුවේ නවතම දත්ත වාර්තාව පෙන්වා දුන්නේය.
එසේම ආනයන වර්ධනය වූවාට අපනයන වර්ධනය වීම හේතුවෙන් පසුගිය වසරේ අගෝස්තු මාසයට සාපේක්ෂව මෙම වසරේ අගෝස්තු මාසයේදී වෙළෙඳ භාණ්ඩ ගිණුමේ හිඟය අඩුවී තිබෙන බවද එම වාර්තාවේ දැක්විණ.
මෙම වසරේ අගෝස්තු මාසයේදී ජංගම ගිණුමේ ශේෂය ඇමෙරිකානු ඩොලර් මිලියන 368 ක් ලෙස සටහන් වන බවත් එය පසුගිය වසරේ අගෝස්තු මාසයට සාපේක්ෂව සියයට 7 ක වර්ධනයක් බවත් එම වාර්තාවේ සඳහන් වේ. එසේම මෙම වසරේ පළමු මාස 8දී මෙරට ජංගම ගිණුමේ ශේෂය ඇමෙරිකානු ඩොලර් බිලියන 2.03 ක් බවත් එය පසුගිය වසරේ පළමු මාස 8ට සාපේක්ෂව සියයට 26.1 වර්ධනයක් බවත් එම වාර්තාව පෙන්වා දෙයි. පසුගිය වසරේ පළමු මාස 8 හි මෙරට ජංගම ගිණුමේ ශේෂය අමෙරිකානු ඩොලර් බිලියන 2.60 ක් විය.
එසේම පසුගිය වසරේ අගෝස්තු මාසයේදී ඇමෙරිකානු ඩොලර් මිලියන 422.3 ක් මෙරට වෙළෙඳ භාණ්ඩ ගිණුමේ හිඟය මෙම වසරේ අගෝස්තු මාසයේදී ඇමෙරිකානු ඩොලර් මිලියන 414.2 දක්වා අඩුවී ඇතැයිද එම වාර්තාවේ සඳහන් වේ. කෙසේ නමුත් පසුගිය වසරේ පළමු මාස 8හි ඇමෙරිකානු ඩොලර් බිලියන 3.56 ක් වූ වෙළෙඳ භාණ්ඩ ගිණුමේ හිඟය මෙම වසරේ පළමු මාස 8දී ඇමෙරිකානු ඩොලර් බිලියන 4.26 දක්වා ඉහළ ගොස් ඇතැයිද එම වාර්තාවේ දැක්වේ.