උණවටුන ඩී.ජී.සුගතපාල

ගාල්ල අඟුලු‍ගහ විලේහේන තේ කම්හල ගාල්ල දිස්ත්‍රික්කයේ ප්‍රධාන තේ කම්හලකි. පත්මා සමුහ ව්‍යාපාරයට අයත් එම කම්හලේ මේ දිනවල දක්නට ලැබෙන්නේ කම්හලේ සේවක පිරිසට වඩා විදේශීය සංචරකයෝය. ඔවුන් එසේ පැමිණෙන්නේ ශ්‍රි ලංකාවේ තේ නිෂ්පාදනය පිළිබඳ දැනුවත් විමටය. ඒ සඳහා කම්හලේ පාලන අධිකාරියද විශේෂ ප්‍රවර්ධන වැඩ සටහනක් ආරම්භ කර ඇත.

මේ මස 01 වන දින සිට 10 වන දින දක්වා කාලය ඇතුළත මෙම වැඩ සටහන පවත්වනු ලබන අතර ඒ සඳහා සහභාගි වීමට දිනකට විදේශිකයෝ දහසත් එක් දහස් පන්සියත් අතර පිරිසක් පැමිණෙති.

මෙම වැඩ සටහන පිළිබඳව පත්මා සමුහ ව්‍යාපාරයේ සභාපති අල්හාජ් එම්. එම්. ඒ. වකිර් මහතා මෙසේ විස්තර කළේය. 

මෙම වැඩ සටහන පැවැත්වෙන්නේ දෙවැනි වරටයි. අපි පසුගිය වසරෙත් මෙම වැඩ සටහන පැවැත්වූවා. මෙරටට සංචාරකයන් ගෙන්වන ආයතනයක් මගින් මෙම සංචාරකයන් රැගෙන එනවා. අප මෙම වැඩ සටහන දවස් දහයක් පවත්වනවා.

ඒ සඳහා දවසකට දහසකට අධික විවිධ රටවල විදේශිකයන් පිරිසක් එනවා. ඔවුන් අපේ සේවක පිරිස විසින් උණුසුම් අයුරින් පිළිගන්නවා. ඊට පසු තේ දලු‍ නෙළන ස්ථානයේ සිට නිමි තේ ඇසුරුම් කරන තැන දක්වා ඔවුන් නරඹනවා. ඔවුන් අපේ තේ කම්හලේදීම පානය කර රස බලනවා. මෙය සංචාරක ව්‍යාපාරයේ දියුණුවට මෙන්ම අපේ ශ්‍රී ලංකා තේ ලෝකයේ ප්‍රවර්ධනය කිරිමට හේතු වෙනවා. ඒ වගේම මෙම ප්‍රවර්ධන වැඩ සටහන නිසා ඉදිරියේදි තව තවත් විශාල වශයෙන් සංචාරකයන් ලංකාවට ගෙන්වා ගැනීමට හැකි වෙනවා.

අපේ කම්හලේ දිනකට දලු‍ කිලෝ දස දහසකට වැඩිය අඹරනවා.