මෙම වසරේ ආදායම් ඉලක්කයෙන් සියයට 90 පසුගිය 20 වැනිදා වනවිට ශ්‍රී ලංකා රේගුව සපුරා අවසන් බවත් මෙම වසරේ සෑම මසකම ආදායම් ඉලක්කය සැලකිය යුතු ප්‍රමාණයකින් රේගුව පසුකර තිබෙන බවත් නවතම දත්ත වාර්තා පෙන්නුම් කළේය.

මෙම වසර සඳහා ශ්‍රී ලංකා රේගුවට රුපියල් බිලියන 2,115 ක ආදායම් ඉලක්කයක් තිබෙන අතර, එය පසුගිය වසරට සාපේක්ෂව සියයට 36.2 ක වර්ධනයකි. පසුගිය වසරේදී රේගුවේ ආදායම් ඉලක්කය රුපියල් බිලියන 1,553 ක් විය. පසුගිය 20 වැනිදා වනවිට ශ්‍රී ලංකා රේගුව රුපියල් බිලියන 1,906 ක ආදායමක් උපයා තිබූ අතර, එය මෙම වසරේ ආදායම් ඉලක්කයෙන් සියයට 90 ක ප්‍රතිශතයකි. පසුගිය සැප්තැම්බර් මාසයේදී ශ්‍රී ලංකා රේගුව රුපියල් බිලියන 253.2 ක් වාර්තාගත ආදායමක් උපයා ගෙන තිබූ අතර, පසුගිය 16 වැනිදා ඉතිහාසයේ එක් දිනකදී ශ්‍රී ලංකා රේගුව උපයා ගත් වැඩිම අදායම වූ රුපියල් බිලියන 24.9 මුදල උපයා ගෙන තිබිණි.

ශ්‍රී ලංකා රේගුවේ මෙම ප්‍රගතිය පිළිබඳව අදහස් දක්වමින් එහි අධ්‍යක්ෂක ජනරාල් සීවලී අරුක්ගොඩ මහතා ප්‍රකාශ කර සිටියේ රේගුවට මෙම වසරේ ආදායම් ඉලක්කය පහසුවෙන් පසුකර යා හැකි බවයි.