ප්‍රේමකීර්ති රණතුංග

ශ්‍රී ලංකාව සහ මැලේසියාව අතර සංචාරකයන් වැඩි කිරීම අරමුණු කරගත් ඒකාබද්ධ ප්‍රවර්ධන වැඩ සටහනක් මැලේසියා  සංචාරක අධිකාරිය සහ ශ්‍රී ලංකන් ගුවන් සේවය විසින් ආරම්භ කරනු ලැබ ඇත. දෙරට  අතර සංචාරකයන්ට විවිධ ආකර්ෂණීය ස්ථාන ප්‍රදර්ශනය කිරීමට දෙරටම උත්සාහ දරමින් සිටී.

ශ්‍රී ලංකන් ගුවන් සේවයේ ආයතනික සන්නිවේදන කළමනාකරු දීපාල් පෙරේරා මහතා පැවසුවේ මෙම හවුල්කාරීත්වය දෙරටේම සංචාරක කර්මාන්තය වැඩි දියුණු වීම සඳහා වැදගත් වනු ඇති බවය. මේ  වනවිට ශ්‍රී ලංකා පවුලේ නිවාඩු ගත කරන විදේශිකයන්ගේත් සාප්පු සවාරි සඳහා ගමන් කරන සංචාරකයන්ගේත් වැදගත් වෙළෙඳ පොළක් ලෙස ක්‍රමයෙන් මතුවෙමින්  ඇතැයිද ඒ මහතා සඳහන් කළේය.

ශ්‍රී ලංකන් ගුවන් සේවය සහ මැලේසියා සංචාරක අධිකාරිය එක්ව සංවිධානය කළ සංචාරකයක් යටතේ ඉකුත්දා එරට සංචාරය කළ මාධ්‍යවේදීන් පිරිසකට මැලේසියාවේ ජනප්‍රිය සංචාරක කලාප ගණනාවක් දැක බලා ගැනීමේ අවස්ථාව හිමි විය. මෙහි දැක්වෙන්නේ එරට  ඉදිකර ඇති සුවිසල් ජල ක්‍රීඩා උද්‍යානයකි. අක්කර 18ක භූමි ප්‍රදේශයක මුහුදු කොල්ලකරුවන්ගේ  වෘත්තාන්තයකට අයත් ඇමසෝනියා නෞකාවේ අනුරුවක් සමග ඉදිකර ඇති මෙම ජල උද්‍යානය කෘත්‍රිම වෙරළකින් යුතු සුන්දර ජලාශයකින්ද යුතුය. ජල ක්‍රීඩා අංග 18ක් එම උද්‍යානයට අයත් වේ.

මැලේසියානු නිලධාරියකු පැවසුවේ ශ්‍රී ලාංකිකයන්ට වීසා රහිතව එරට සංචාරය  කිරීමේ අවස්ථාව උදාකර දීමට හැකිදැයි මේ දිනවල සලකා බලාගෙන යන බවය.

මලක්කා සමුද්‍ර සංධියට මුහුණලා ඇති ඓතිහාසික මලක්කා නගරය, කේබල් කාර් සුපිරි වෙළෙඳසැල් සහ සුඛෝපභෝගී හෝටල්වලින් යුතු ‘‘නේටින් හයිලන්ඩ්’’ සහ ක්වාලාම්පූර් අගනුවර සාප්පු සවාරි සංචාරකයන් අතර බෙහෙවින් ජනප්‍රියව පවතී. එම ප්‍රදේශවල සංචාරය කිරීමට අපේක්ෂා කරන ශ්‍රී ලාංකික සංචාරකයන් සඳහා ශ්‍රී ලාංකික සංචාරකයන් සඳහා ශ්‍රී ලංකන් ගුවන් යානා දිනපතාම ක්වාලාලම්පූර් අගනුවර බලා පියසර කරන බවද ශ්‍රී ලංකන් ගුවන් සේවය සඳහන් කරයි.