පසුගිය වසරේ පළමු මාස 8 ට සපෙක්ෂව සියයට 19.3 ක වර්ධනයක්

විදෙස්ගත ලාංකිකයන් අගෝස්තු මාසයේදී මෙරටට එවූ මුදල ඩොලර් මිලියන 680.8 ක්

විමුක්ති එස් රුද්‍රිගු

මෙම වසරේ පළමු මාස 8 තුළ විදේශ ගතව සිටින ශ්‍රී ලාංකිකයන් ඇමෙරිකානු ඩොලර් බිලියන 5.11 ක මුදල් ප්‍රමාණයක් මෙරටට ඒවා ඇති බවත්, එය පසුගිය වසරේ පළමු මාස 8 ට සපෙක්ෂව සියයට 19.3 ක වර්ධනයක් බවත් ශ්‍රී ලංකා මහ බැංකුව නිකුත් කළ නවතම දත්ත වාර්තාවේ දැක්වේ.

එම වාර්තාවට අනුව පසුගිය වසරේ පළමු මාස 8 තුළ විදේශ ගතව සිටින ශ්‍රී ලාංකිකයන් මෙරටට ඇමෙරිකානු ඩොලර් බිලියන 4.28 ක මුදල් ප්‍රමාණයක් මෙරටට ඒවා තිබිණි. එසේම පසුගිය මාසයේදී විදෙස් ගතව සිටින ශ්‍රී ලාංකිකයන් ඇමෙරිකානු ඩොලර් මිලියන 680.8 ක මුදලක් මෙරටට ඒවා ඇත. පසුගිය වසරේ අගෝස්තු මාසයේදී විදෙස් ගතව සිටින ශ්‍රී ලාංකිකයන් මෙරටට ඩොලර් මිලියන 577.5 ක මුදලක් එවා තිබිණි.

පසුගිය වසරේදී විදෙස් ගතව සිටින ශ්‍රී ලාංකිකයන් ඇමෙරිකානු ඩොලර් බිලියන 6.57 ක මුදල් ප්‍රමාණයක් මෙරටට ඒවා තිබූ අතර, වත්මන් ප්‍රවණතාව අනුව එම මුදල මෙම වසරේදී පසුකර යාමට හැකි වෙතැයි අපේක්ෂා කෙරේ. මෙරටට වැඩිම විදේශ ප්‍රේෂණ ප්‍රමාණයක් ලැබෙන්නේ මැද පෙරදිග රටවල්වලින් වන අතර, කුවේටය, සෞදි අරාබිය, කටාරය සහ එක්සත් අරාබි එමීර් රාජ්‍යය පෙරමුණේ සිටී.