• 2024 වසරේ පළමු මාස 7 ට සාපේක්ෂව සියයට 19.5 ක වර්ධනයක්
• ජ‌ූලි මාසයේදී පමණක් එවූ මුදල ඩො.මි. 697.3 ක්

විමුක්ති එස් රුද්‍රිගු

මෙම වසරේ පළමු මාස 7 තුළදී විදේශගතව සිටින ශ්‍රී ලාංකිකයන් ඇමෙරිකානු ඩොලර් බිලියන 4.43 ක මුදල් මෙරටට ඒවා ඇති අතර එය 2024 වසරේ පළමු මාස 7 ට සාපේක්ෂව සියයට 19.5 ක වර්ධනයකි.

2024 වසරේ පළමු මාස 7 තුළදී විදේශගතව සිටින ශ්‍රී ලාංකිකයන් මෙරටට ඩොලර් බිලියන 3.71 ක මුදල් ප්‍රමාණයක් මෙරටට ඒවා තිබිණි. එසේම පසුගිය ජූලි මාසයේදී විදේශගතව සිටින ශ්‍රී ලාංකිකයන් මෙරටට ඩොලර් මිලියන 697.3 ක මුදලක් මෙරටට එවා තිබූ අතර 2024 වසරේ ජූලි මාසයේදී විදේශගතව සිටින ශ්‍රී ලාංකිකයන් මෙරටට ඒවා තිබුණේ ඩොලර් මිලියන 566.8 ක් පමණි.

විදේශගතව සිටින ශ්‍රී ලාංකිකයන් 2018 වසරින් පසුව මෙරටට එවූ වැඩිම මුදල් ප්‍රමාණය පසුගිය වසරේ වාර්තා වූ අතර එහිදී විදේශගතව සිටින ශ්‍රී ලාංකිකයන් මෙරටට ඩොලර් බිලියන 6.57 ක් ඒවා තිබිණි. එය 2023 වසරට සාපේක්ෂව සියයට 10.1 වර්ධනයක්ද විය.

වත්මන් ප්‍රවණතාව ඉදිරියටත් පැවතුණහොත් විදේශගතව සිටින ශ්‍රී ලාංකිකයන් පසුගිය වසරේදී මෙරටට එවා තිබූ මුදල් ප්‍රමාණය මෙම වසරේදී පහසුවෙන් පසුකර යාමට හැකියාව තිබෙන අතර එසේ වුවහොත් 2018 වසරින් පසුව වසරක් තුළ මෙරටට ලැබුණු විදේශ ප්‍රේෂණ ප්‍රමාණය මෙම වසරේදී වාර්තා වනු ඇත.