විමුක්ති එස් රුද්‍රිගු
ප්‍රංශයට මෙරටට ලබාදී ඇති ණය ප්‍රතිව්‍යුහගත කිරීමේ ද්වී පාර්ශ්වික ගිවිසුමට ශ්‍රී ලංකාව සහ ප්‍රංශය පසුගියදා අත්සන් තැබූ බවත් ණය ගිවිසුමට අත්සන් තැබීමේ නිල උත්සවය කොළඹදී පෙරේදා (16) පැවැත්වුණු බවත් මුදල් අමාත්‍යාංශය නිවේදනයක් නිකුත් කරමින් ඊයේ (17) ප්‍රකාශ කළේය.
ද්වී පාර්ශ්වික ණය ගිවිසුමට ශ්‍රී ලංකාව වෙනුවෙන් මුදල් අමාත්‍යාංශයේ ලේකම් මහින්ද සිරිවර්ධන මහතා අත්සන් තැබූ බවත් ප්‍රංශ ජනරජය වෙනුවෙන් බහු පාර්ශ්වික කටයුතු, වෙළෙඳ හා ප්‍රතිපත්ති සංවර්ධන දෙපාර්තමේන්තුවේ සහාකාර ලේකම්, භාණ්ඩාගාර අධ්‍යක්ෂ ජනරාල් විලියම් රූස් මහතා අත්සන් තැබු බවත් මුදල් අමාත්‍යාංශය පැවැසුවේය.
ශ්‍රී ලංකාව සහ ප්‍රංශය ණය ගිවිසුමකට අත්සන් තැබීම මෙරට බාහිර ණය ප්‍රතිව්‍යුහගත කිරීමේ ක්‍රියාවලියේ සන්ධිස්ථානයක් පසු කිරීමක් බවද මුදල් අමාත්‍යාංශය ප්‍රකාශ කළේය. එමගින් මෙරට ණය තිරසරභාවය යථා තත්වයට පත් කිරීම සහ ශ්‍රී ලංකාවේ ආර්ථිකය නැවත ගොඩනැගීමට ණය ප්‍රතිව්‍යුහගත කිරීමේ ක්‍රියාවලිය කඩිනමින් නිම කිරීමට හැකියාව ලැබෙන බවද මුදල් අමාත්‍යංශය පැවැසුවේය.
ජපානය සහ ඉන්දියාව සමග මෙරට නිල ණය හිමියන්ගේ කමිටුවේ සම සභාපතිත්වය දරමින් ශ්‍රී ලංකාවේ විදේශ ණය ප්‍රතිව්‍යුහගත කිරීමේ ක්‍රියාවලියට නායකත්වය ලබාදීමේදී ප්‍රංශය වැදගත් කාර්ය භාර්යයක් ඉටුකර තිබෙන බවද මුදල් අමාත්‍යාංශය ප්‍රකාශ කළේය.