ප්‍රයිම් රෙසිඩන්සීස් සමාගම තවත් විශිෂ්ට ජයග්‍රහණයක් වාර්තා කරගනිමින් බ්‍රෑන්ඩ් ෆිනෑන්ස් (Brand Finance) විසින් නම්කරන ලදි2025 වසරේ ලංකාවේ වටිනාම සන්නාම 100’ (Sri Lanka’s Top 100 Most Valuable Brands 2025) ලැයිස්තුවට ඇතුළත් වීමට පසුගියදා සමත් විය. මෙම ලැයිස්තුවට ඇතුළත් වූ එකම දේපළ වෙළෙඳාම් සන්නාමය ප්‍රයිම් රෙසිඩන්සීස් වීම විශේෂත්වයකි. 

ලංකාවේ දේපළ වෙළෙඳාම් ක්ෂේත්‍රය බෙහෙවින් තරගකාරී ක්ෂේත්‍රයකි. එබඳු තරගකාරීත්වයක් හමුවේ පවා මෙම ලැයිස්තුවට ඇතුළත් වූ එකම දේපළ වෙළෙඳාම් සන්නාමය බවට පත් වීමෙන් පෙනී යන්නේ, ප්‍රයිම් රෙසිඩන්සීස් මෙරට දේපළ ක්ෂේත්‍රයේ අවිවාදිත ප්‍රමුඛයා බවට පත් වී ඇති බවයි. 

එමෙන්ම එය ප්‍රයිම් සමූහය විසින් දශක තුනක් පුරා අත් කරගත් සාර්ථකත්වය, විශිෂ්ටත්වය සහ පාරිභෝගික විශ්වාසය වෙනුවෙන් ලැබුණු තවත් සුවිශේෂී ඇගයුමක් ලෙසද හැඳින්විය හැකි වේ. මෙමගින් පාරිභෝගිකයන් තුළ ප්‍රයිම් රෙසිඩන්සීස් සමාගම සම්බන්ධයෙන් පවතින විශ්වාසය තවදුරටත් තීව්‍ර වනු ඇති අතර, නව පාරිභෝගිකයන් ආකර්ෂණය කරගැනීමටද එය ඉවහල් වනු ඇත. 

අතීතයේ පටන් මේ දක්වාම විශ්වාසය, සුවපහසුව සහ කල් පවතින වටිනාකම යනාදී ගුණාංගවලට මුල් තැන දෙමින්, රටේ ජනතාවට උසස්ම ප්‍රමිතියෙන් යුත් නිවාස මිලදී ගැනීමට අවස්ථාව සලසා දීමට ප්‍රයිම් රෙසිඩන්සීස් කටයුතු කර තිබේ.

මේ සම්බන්ධයෙන් අදහස් දක්වමින් ප්‍රයිම් සමූහ ව්‍යාපාරයේ සභාපති ප්‍රේමලාල් බ්‍රාහ්මණගේ මහතා පැවසුවේ මෙය උසස් ප්‍රමිතිය, තිරසාරත්වය සහ නවෝත්පාදනය සඳහා ප්‍රයිම් රෙසිඩන්සීස් තුළ ඇති කැපවීම නැවත වරක් තහවුරු කරන ජයග්‍රහණයක් බවයි. එමගින් පදිංචිකරුවන්ගේ ජීවන රටාව වැඩිදියුණු කරන සහ ලංකාවේ නාගරික සංවර්ධනයට අර්ථවත් දායකත්වයක් ලබා දෙන ජීවන අවකාශ නිර්මාණය කිරීමේ ප්‍රයිම් මෙහෙවර තවදුරටත් ශක්තිමත් වනු ඇති බවද ඒ මහතා පැවසීය. 

Brand Finance Sri Lanka 100 ලැයිස්තුවට ඇතුළත් වන සන්නාම ශ්‍රේණිගත කරනු ලබන්නේ මූල්‍ය ශක්තිය, පාරිභෝගික විශ්වාසය සහ සන්නාම බලපෑම යනාදී සාධක රැසක් සැලකිල්ලට ගනිමිනි. ශක්තිමත් ව්‍යාපාරික ආකෘතිය සහ මූල්‍ය ස්ථාවරත්වය මෙන්ම රට පුරා සාර්ථක ලෙස ක්‍රියාවට නංවන ලද දේපළ ව්‍යාපෘති මගින් නිර්මාණය කරන ලද දීර්ඝකාලීන වටිනාකම් යනාදී සාධක හේතුවෙන්, මෙම ලැයිස්තුවට ඇතුළත් වූ එකම දේපළ වෙළෙඳාම් සමාගම බවට පත් වීමට ප්‍රයිම් රෙසිඩන්සීස් සමත් විය.