භානුක අමරසිංහ 
සතිය ආරම්භයේදී පිට පිට දින දෙකක් පසුබැසීමට ලක් වූ කොළඹ කොටස් හුවමාරුව ඊයේ (27) දිනයේදී සුළු ඉහළ යාමක් පෙන්නුම් කළේය. 
ඒ අනුව දිනයේ ගනුදෙනු අවසානයේදී සියලු‍ කොටස් මිල දර්ශකය (ASPI)  ඒකක 16,430.77ක් දක්වා ඒකක 85.76කින් එනම් සියයට 0.52 කින් ඉහළ නැග තිබුණි. එසේම ස්ටෑන්ඩර්ඩ් ඇන්ඩ් පුවර්ස් ශ්‍රී ලංකා දර්ශකය (S&PSL20)  ඒකක 4,898.28ක් දක්වා ඒකක 0.98කින් එනම් සියයට 0.02කින් ඉහළ නැග තිබුණි. 
මෙහිදී දිනය තුළ කොටස් 67,380,732ක් ගනුදෙනු වී ඇති අතර, දිනයේ සමස්ත පිරිවැටුම රුපියල් මිලියන 1,665ක් ලෙස සටහන්ව තිබුණි. මෙහිදී එම පිරිවැටුම සඳහා ෂෙව්රොන් ලු‍බ්රිකන්ට්ස් ලංකා (මිලියන 149ක්), ජෝන් කීල්ස් හෝල්ඩිංග්ස් (මිලියන 114ක්), කොමර්ෂල් බැංකුව (මිලියන 79ක්) ලෙස වැඩිම දායකත්වයක් ලබාදී තිබේ.