කොළඹ කොටස් වෙළෙඳාම තුළ නැවත වාරයක් මෑතකාලයේ ඉහළම අගය දක්වා සියලු කොටස් මිල දර්ශකය පැමිණ ඇති අතර දින තුනක් තුළ නැවත වාරයකින් දර්ශක අට සියයකින් පමණ ජවයක් ගැනීම විශේෂිත සිද්ධියකි. 
ඉරානය හා ඊශ්‍රායලය අතර යුද උණුසුම පිළිබඳව සැක පහළ කරන ලද ගනුදෙනුකරුවන් මුදල් ඉවත් කරගැනීමට යුහුසුළු වී සිටින බව ඇතැම් ආයෝජන උපදේශකයන්ගේ මතය වී තිබුණ නමුත් සටන් විරාම තත්වය තුළ නැවතත් වෙළෙදපොළ ප්‍රසාරණයක් වාර්තා කෙරේ. බොරතෙල් මිල ගණන් තාවකාලිකව ඉහළ ගිය නමුත් ඊයේ වන විට නැවතත් සාමාන්‍ය බැරලයක මිල ඇ. ඩො. 64.78 ක ස්ථාවර වන බව ජාත්‍යන්තර මාධ්‍ය වාර්තාකර තිබුණි. 
ගනුදෙනු අවසානයේ දී සියලු කොටස් මිල දර්ශකය ඒකක 17,535.62 ක් වු අතර එය කලින් දිනයට සාපේක්ෂව දර්ශක 344.42  ක වර්ධනයකි. එස් ඇන්ඩී පී ශ්‍රී ලංකා දර්ශකය 5,219.01 ක් වශයෙන් අවසන් වූ අතර එය දර්ශක 85.11 වර්ධනයක් සේ  වාර්තා වේ. දෛනික පිරිවැටුම රු. මිලියන 5,911.41 ක් විය. කොටස් මිලියන 253.4 ක් හුවමාරු වූ බව දැක්වේ. මෙදින වාර්තා වූ ගනුදෙනු ප්‍රමාණය 32,278 කි. සමාගම් 214 ක කොටස් මිල ඉහළ ගියේය. කොටස් මිල පහත වැටුණ සමාගම් ගණන 45 කි. 
විදේශීය ගනුදෙනු සහභාගීත්වය සලකා බලන පසු විකිණීමේ ප්‍රවණතාව නිරික්ෂණය කළ හැකිව තිබුණ අතර මිල දී ගැනීම් රු. මිලියන 180.6 ක් වූ අතර විකිණීම් රු. මිලියන 421.1 කි. ලංකා ක්‍රෙඩිට් ඇන්ඩ් බිස්නස් ෆිනෑන්ස් සමාගම කොටසකට ශත පහළොවක ලාභාංශ ප්‍රකාශයට පත් කර ඇත. 
ජෝන් කීල්ස් රු. මිලියන 437 ක්, පෑන් ඒෂියා  රු. මිලියන 296, හැටන් නැෂනල් ෆිනෑන්ස් රු. මිලියන 282 ක්, එල්.වී.එල් එනර්ජි රු. මිලියන 262 ක්,  ඩිප් ප්‍රඩක්ට්  රු. මිලියන 218 ක්, සම්පත්  රු. මිලියන 181 ක් ආදී වශයෙන් පිරිවැටුමට වැඩිම දායකත්වයක් දැක්විය.

නිරීක්ෂක