• පසුගිය වසරේ බදු පෙර අලාබය රුපියල් මිලියන 64.5ක් 

ඩයලොග් ෆිනෑන්ස් පීඑල්සී සමාගම 2025 වසරේ සැප්තැම්බර් 30 වැනිදායින් අවසන් වූ මුල් මාස නවයක කාලය තුළදී රුපියල් මිලියන 217.1ක බදු පෙර ලාබයක් වාර්තා කිරීමට සමත්ව ඇතැයි පවසයි. 
මෙය පසුගිය වසරේ එම කාලසීමාවේදී වාර්තා කළ රුපියල් මිලියන 64.5ක බදු පෙර අලාභයට සාපේක්ෂව කැපී පෙනෙන සාර්ථකත්වයක් බව සමාගම පවසයි. 
 “මෙම තත්වයත් සමගින්ම වසරේ මුල් මාස නවය තුළදී සමාගම රුපියල් මිලියන 92.6 ක බදු ගෙවීමෙන් අනතුරුව රුපියල් මිලියන 124.4ක ශුද්ධ ලාබයක් වාර්තා කරගැනීමට සමත්ව තිබෙනවා.” 
මේ සඳහා හේතු ලෙස අදාළ කාලසීමාවේදී සමාගමේ ණය පොතෙහි ශක්තිමත් වර්ධනයක් පෙන්නුම් කරමින් රුපියල් බිලියන 8.2ක් බවට පත්ව ඇතැයි සමාගම පවසයි. මෙය පසුගිය වසරේ එම කාලසීමාව හා සැසඳීමේදී සියයට 94ක වර්ධනයකි. 
එසේම ඉතුරුම් තැන්පතු සහ ස්ථාවර තැන්පතු තුළ පෙන්නුම් කළ ඉහළ කාර්යසාධනයත් සමගින් සමාගමේ තැන්පතු පදනමද රුපියල් බිලියන 5.7ක් මට්ටමට පත්වෙමින් පෙර වසරට සාපේක්ෂව සියයට 61.8ක වර්ධනයක් පෙන්නුම් කර තිබේ. 
මේ අතර වසරේ මුල් මාස නවය තුළදී සමාගමේ මෙහෙයුම් ආදායමද රුපියල් බිලියන 1.6ක් ලෙස පෙර වසරට සාපේක්ෂව සියයට 128.8ක වර්ධනයක් සටහන් කර තිබේ. එසේම මෙම කාලසීමාවේදී සිය ප්‍රාග්ධන සහ ද්‍රවශීලතා මට්ටම්ද මහ බැංකුව මගින් නියම කර ඇති අවම අවශ්‍යතාවලට වඩා ඉහළින් පවත්වාගෙන යාමට සමත්වූ බවද ඩයලොග් ෆිනෑන්ස් පීඑල්සී සමාගම පවසයි.