(යොහාන් භාසුර)

ශ්‍රී ලංකා පරිගණක සංගමය සංවිධානය කරන 40 වැනි ජාතික තොරතුරු තාක්‍ෂණ සම්මන්ත්‍රණය ‘ඩිජිටල්මය වශයෙන් ජීවිත එළිය කිරීම’ යන තේමාව යටතේ ෂැංග්‍රිලා හෝටලයේදී මේ මස 12 සහ 13 පැවැත්වේ.

ශ්‍රී ලංකාව වර්තමානයේ මුහුණදී සිටින ආර්ථික අර්බුදය හමුවේ ඩිජිටල්කරණයෙන් නව ධනවත් ආර්ථිකයක් බිහිකිරීමට අවශ්‍ය පරිසරය නිර්මාණය කිරීමට අඩිතාලම දැමීම මෙම ජාතික තොරතුරු තාක්‍ෂණ සම්මන්ත්‍රණයේ ප්‍රධාන අරමුණක් වන අතර තොරතුරු තාක්‍ෂණ ක්ෂේත්‍රයේ නව නිර්මාණකයන්ට සහ ව්‍යවසාකයන්ට එහි ඊළඟ පියවර දක්වා යෑමට සහාය දැක්වීම සහ ජාතික මට්ටමේ සම්මාන පිරිනැමීම ද මෙහිදී සිදුවේ.

මෙම සම්මන්ත්‍රණයේ දෙවැනි දිනය නැඟීඑන සහ පරිනථ තොරතුරු තාක්‍ෂණ ආයතනවලට ආයෝජකයන් සොයාදීමේ ආයෝජන අවස්ථාවක් ලෙස යොදාගන්නා බවත් දේශීය සහ විදේශීය ආයෝජකයන් සහ ආයතන විශාල සංඛ්‍යාවකට ආරාධනා කර ඇති බවත් ශ්‍රී ලංකා පරිගණක සංගමයේ සභාපති දමිත් හෙට්ටිහේවා මහතා පැවසීය.

මෙම සම්මන්ත්‍රණයේදී තොරතුරු තාක්‍ෂණ ක්ෂේත්‍රයේ විශේෂඥායන් 30 කට ආසන්න පිරිසක් දේශන පැවැත්වීමට නියමිත බව කී දමිත් හෙට්ටිහේවා මහතා තොරතුරු තාක්‍ෂණ ක්ෂේත්‍රයට උනන්දුවක් දක්වන ඕනෑම පුද්ගලයකුට සම්මන්ත්‍රණයට සහභාගි විය හැකි බව ද සඳහන් කළේය.

තොරතුරු තාක්‍ෂණ ක්ෂේත්‍රය ශ්‍රී ලංකාව වර්තමානයේ මුහුණ දී සිටින ආර්ථික අර්බුදයට පිළියම් සෙවීමට වඩාත් සුදුසුම ක්ෂේත්‍රයක් බවත් තොරතුරු තාක්‍ෂණ ව්‍යාපාරයෙන් ඩොලර් බිලියනක ආයතනයක් නිර්මාණය කිරීමට හැකිවන්නේ නම් අර්බුදය අවසන් කළ හැකි බවත් ශ්‍රී ලංකා පරිගණක සංගමයේ උප සභාපති ආචාර්ය අජන්ත අතුකෝරළ මහතා පැවසීය.

එම ඩොලර් බිලියනය තනි පුද්ගලයකු හෝ ආයතන කීපයක එකතුවක් ලෙස ලැබිය හැකි බව කී අතුකෝරළ මහතා ශ්‍රී ලංකාවේ අර්ථිකයට තොරතුරු තාක්‍ෂණ ක්ෂේත්‍රයේ දායකත්වය සියයට 15 ක් දක්වා ඉහළ නැංවිය යුතු බව ද සඳහන් කළේය.