යොහාන් භාසුර
දේශීය කුලී රථකරුවන් සහ යෙදුම් පාදක කරගත් කුලී රථකරුවන් අතර පවතින ගැටලු‍කාරී තත්වය ඉහළ යෑම ශ්‍රී ලංකාවේ සංචාරක කර්මාන්තයේ ප්‍රවර්ධනයට බාධාවක් වී ඇති බව මෙරට ජනප්‍රියම මගී ප්‍රවාහන කුලී රථ සමාගමක් වන PickMe සමාගමේ ප්‍රධාන විධායක නිලධාරී ජෙෆ්රි සුල්ෆර් මහතා පැවසීය.
මෙරට තුළ පසුගිය සති 12 දී දේශීය කුලී රථ කණ්ඩායම් මගීන් ප්‍රවාහනය කිරීම සඳහා යෙදුම් පාදක කරගත් රියැදුරන්ට හිරිහැර කිරීම සහ බාධා කිරීම සම්බන්ධයෙන් සිද්ධි 30 ක් පමණ වාර්තා වී ඇති බවත් මෙම සිදුවීම්වලදී විනාශකාරී ක්‍රියා සහ වාහනවලට හානි කිරීම පමණක් නොව, යෙදුම් පාදක කරගත් ගමන් සේවා රියැදුරන්ට තුවාල ද කර ඇති බවත් ඒ මහතා කීය.
මෙවැනි සිදුවීම් වන අතරතුර විදේශීය සංචාරකයන් සිය නිවාඩු කාලය තුළ යෙදුම් පාදක කරගත් ප්‍රවාහන රථවල පහසුකම් ගැනීමට කටයුතු කරමින් සිටි බව කී සුල්ෆර් මහතා මෙම සිදුවීම් රියැදුරන් අවදානමට ලක් කරනවා පමණක් නොව සංචාරකයන්ගේ ආරක්ෂිත සහ පිළිගැනීමේ ගමනාන්තයක් ලෙස ශ්‍රී ලංකාවේ කීර්තිනාමයට තර්ජනයක් බව ද සඳහන් කළේය.

ශ්‍රී ලංකාවේ ප්‍රමුඛතම කුලී රථ සමාගමක් වන PickMe ආයතනයේ දත්ත හරහා රට පුරා එවැනි ගැටුම් බහුලව දක්නට ලැබෙන ප්‍රධාන ස්ථාන කිහිපයක් හෙළිවන බවත් මෙම වර්ධනය වන ආරක්ෂක ගැටලු‍ විසඳීමට සහ ඒවාට සම්බන්ධ සියලු‍ දෙනාගේ ආරක්ෂාව සහතික කිරීමට නීතිය ක්‍රියාත්මක කරන බලධාරීන් ඉක්මන් පියවර ගත යුතු බවත් ඒ මහතා කීය.
PickMe සමාගමේ ප්‍රධාන විධායක නිලධාරී ජෙෆ්රි සුල්ෆර් මහතා වැඩිදුරටත් මෙසේ ද පැවසීය.
“යෙදුම් හරහා ක්‍රියාත්මක වන ප්‍රවාහන සේවා කෙරෙහි මෙම ප්‍රතිරෝධය පැන නගින්නේ එමගින් සාම්ප්‍රදායික ක්‍රියාකරුවන්ගෙන් ව්‍යාපාරයට බලපෑමක් වන්නේ යැයි ඇති වැරදි මතය නිසායි. මෘදුකාංග මගින් මෙහෙයවනු ලබන ප්‍රවාහන සේවා දුර බැහැර ප්‍රදේශවලින් සංචාරකයන් ඔවුන්ගේ ප්‍රදේශවලට ගෙන ඒමට උපකාරී වන අතර එමගින් දේශීය ව්‍යාපාර සඳහා අවස්ථා නිර්මාණය වේ. ඊට අමතරව සීමිත ප්‍රවේශ්‍යතාව සහ ඉහළ මෙහෙයුම් පිරිවැය හේතුවෙන් සාම්ප්‍රදායික ක්‍රියාකරුවන් බොහෝ විට ඔවුන්ගේ ප්‍රදේශවලට සංචාරකයන් ගෙන්වා ගැනීමට නොහැකි වේ. එබැවින් තාක්ෂණය මගින් මෙහෙයවනු ලබන ප්‍රවාහනය තරගකාරීත්වයක් ලෙස හෝ තර්ජනයක් ලෙස බැලීම වෙනුවට, එය ඇත්ත වශයෙන්ම සමස්ත කර්මාන්තය වඩාත් කාර්යක්ෂම කරන පද්ධතියක් බව තේරුම් ගැනීම අවශ්‍ය වෙනවා.”