කරන්දෙණිය එම්.සුසිල් පියන්ත 

පිවිතුරු තේ දලු‍ නිෂ්පාදනය කිරිමට කුඩා තේවතු හිමියන් දැනුම්වත් කිරීමේ වැඩසටහනක් ඇල්පිටිය රෑකඩහේන තේ කර්මාන්ත ශාලා පරිශ්‍රයේදී පවැත්විණ.

කුඩා තේවතු සංවර්ධන අධිකාරිය විසින් සංවිධානය කරනු ලබන මේ වැඩසටහන රෑකඩහේන තේ කර්මාන්ත ශාලාවේ අධ්‍යක්ෂක දුෂර ගීගනගේ මහතාගේ අධීක්ෂණය යටතේ සාමාන්‍යාධිකාරී බී.ඩබ්ලිව්.ටී. නදීශන මහතාගේ සම්බන්ධීකරණයෙන් මෙදින පැවැත්විණ.

කුඩා තේවතු සංවර්ධන අධිකාරිය රාජ්‍ය නියමු ව්‍යාපෘතියක් ලෙස තේ වගාවට ඉමහත් ප්‍රසිද්ධියක් උසුලන දිසාවන්හි මේ වැඩසටහන කියාත්මක කරනු ලබන අතර රෑකඩහේන තේ කර්මාන්ත ශාලා පරිශ්‍රයේ පැවැත්වූවේ එහි ගාලු‍ දිසා ව්‍යාපෘතිය බව කුඩා තේ වතු සංවර්ධන අධිකාරියේ ප්‍රකාශකයෙක් කීවේය. ගාලු‍ දිසාවේ කුඩා තේවතු හිමියන්ගෙන් වඩාත් පලදායී පිවිතුරු තේ දලු‍ ලබා ගැනීමේ අරමුණින් සංවිධානය කරන ලද මේ වැඩසටහන ගාලු‍ දල්ලෙන් රටට ගැම්මක් යන නමින් නම් කොට තිබිණ.

මේ වැඩසටහනට කුඩා තේවතු සංවර්ධන අධිකාරියේ සභාපති නිමල් උඩුගම්පොළ, එම අධිකාරියේ නියෝජ්‍ය සාමාන්‍යාධිකාරී රෝහිත වෛද්‍යරත්න, ගාල්ල ප්‍රාදේශීය කළමනාකරු ඉන්දික මොහොට්ටි, ශ්‍රී ලංකා තේ මණ්ඩලයේ සහකාර තේ කොමසාරිස් එල්.කේ.අජිත් ශ්‍රී ලංකා තේ පර්ෙ ය්ෂණායතනයේ ප්‍රදීප් අල්විස් යන මහත්වරු ඇතුළු පිරිසක් සහභාගී වූහ.

මේ වැඩසටහනට රෑකඩහේන තේ කර්මාන්ත ශාලාව තෝරාහැනීමට විශේෂයෙන්ම හේතුවූවේ මේ තේ කර්මාන්ත ශාලාවට කුඩා තේ වතු හිමියන් 2,000ක් පමණ තේ දලු‍ සැපයීමත් කර්මාන්තශාලාවට අනුබද්ධ රජයේ අනුමත තේ පැළ තවාන් ක්‍රියාත්මක කරමින් ලාංකීය තේ කර්මාන්තයට අත්‍යාවශ්‍ය ම කරුණක් වන නැවත තේ වගාවට අවශ්‍ය ගුණාත්මක තේ පැළ වාර්ෂිකව 650,000ක ප්‍රමාණයක් තේ ඉඩම් හිමි ප්‍රජාව වෙත නිකුත් කිරීම සැලකිල්ලට ගනිමින් බවද එම අධිකාරිය කියයි.

මේ එම වැඩමුළුව ආරම්භ කරමින් පොල් තෙල් පහන දැල්වූ අයුරු සහ වැඩසටහනට සහභගීවූ කුඩා තේවතු හිමියන් පිරිසක් ඡායාරූප වලින් දැක්වේ.