අලුත් ගනුදෙනු සතියක් ආරම්භ කරන ලද කොළඹ කොටස් වෙළෙදපොළ එක දිනක් තුළ මෑත කාලයේ ඉහළම අගයකින් සියලු කොටස් මිල පිරිහීම (ඊයේ ජුනි 23) වාර්තා කළේය. ගනුදෙනු අවසානයේ දී සියලු කොටස් මිල දර්ශකය ඒකක 16,765.40 ක් වු අතර එය කලින් දිනයට සාපේක්ෂව දර්ශක 322.55 ක පිරිහීමකි. මෙම වසරේ පෙබරවාරි 05 වැනි දා දිනක් තුළ වැඩිම පසුබැසීම වශයෙන් ඒකක 500.10 ක් පහත වැටුණ අතර එයින් ඉනික්බිතිව සිදු වූ ඉතා අවදානම් සහගත බිඳ වැටීමක් බව දැක්වේ. කෙසේ වෙතත් ඊයේ ගනුදෙනු අවසන් වන විට පෙබරවාරි මුල් සතියේ තිබුණ සියලු කොටස් මිල දර්ශකයට ආසන්න තැනකට පත්ව තිබීම ද විශේෂත්වයකි.

ගනුදෙනුවල දී මධ්‍යස්ථ පිරිවැටුමක් වාර්තා කළ අතර ගනුදෙනු ප්‍රමාණය ද සාමාන්‍යයෙන් ඉහළ තත්වයක පැවැතිණ. ජාත්‍යන්තරයේ පවතින අවිනිශ්චිතතා සලකා බලන ආයෝජකයන් සිය කොටස් කෙරෙහි පරෙස්සම්වන බව උපකල්පනය කළ හැකිය. කෙසේ වෙතත් සමාගම් ගණනාවක කොටස් අනපේක්ෂිත ලෙස අඩුවීම පදනම් කරගෙන මිල දී ගැනීමට ද අවස්ථාව විවෘත කර තිබේ. එය අද දිනයේ කොටස් වෙළෙදපොළ හැසිරීම හුවා දක්වනු ඇතැයි සැලකේ.

එස් ඇන්ඩී පී ශ්‍රී ලංකා දර්ශකය 4,991.18 ක් වශයෙන් අවසන් වූ අතර එය දර්ශක 108.10 වර්ධනයක් සේ වාර්තා වේ. දෛනික පිරිවැටුම රු. මිලියන 2,492.68 ක් විය. කොටස් මිලියන 193.8 ක් හුවමාරු වූ බව දැක්වේ. මෙදින වාර්තා වූ ගනුදෙනු ප්‍රමාණය 24,449 කි. සමාගම් 48 ක කොටස් මිල ඉහළ ගියේය. කොටස් මිල පහත වැටුණ සමාගම් ගණන 212 කි. 

විදේශීය ගනුදෙනු සක්‍රීයව තිබුණ අතර මිලදී ගැනීමේ ප්‍රවණතාවක් විය. මිල දී ගැනීම් රු. මිලියන 166.7 ක් වූ අතර විකිණීම් රු. මිලියන 97.4 කි. 

හැටන් නැෂනල් බැංකුව රු. මිලියන 169 ක්, සම්පත් රු. මිලියන 166 ක්, ඊස්ට් වෙස්ට් රු. මිලියන 131 ක්, ඇක්සස් ඉන්ජිනියරිං රු. මිලියන 107 ක් ජෝන් කීල්ස් රු. මිලියන 97 ක්, කෝල්ඩ් ස්ටෝර්ස් රු. මිලියන 80 ක්, කොමර්ෂල් බැංකුව රු. මිලියන 70 ක්, බ්‍රවුන් ඉන්වෙස්ට්මන් රු. මිලියන 70 ක්, ලංකා ඉන්දියන් ඔයිල් රු. මිලියන 59 ක්, සෙලින්කෝ ඉන්ෂුවරන්ස් රු. මිලියන 59 ක්,එල්.ඕ.එල්.සී. හෝල්ඩිං රු. මිලියන 51 ක්, කොමර්ෂල් ලීසිං රු. මිලියන 49 ක් සහ පෑන් ඒෂියා රු. මිලියන 40 වශයෙන් පිරිවැටුමට වැඩිම දායකත්වයක් දැක්විය.

නිරීක්ෂක