---

යොහාන් භාසුර

---

අමෙරිකානු එක්සත් ජනපදය ලබන 9 වැනිදා සිට ශ්‍රී ලංකාවේ අපනයනවලට පැනවූ සියයට 44 ක තීරු බද්ද මෙරට අපනයන භාණ්ඩ පහකට බලපෑමක් වන බවත්, එය ඇමරිකාවට අපනයනය කරන භාණ්වලින් සියයට 86 ක් පමණ වන බවත් කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා ඊයේ (6) පැවසීය.

 

රජයේ ප්‍රවෘත්ති දෙපාර්තමේන්තුවේදී විශේෂ මාධ්‍ය හමුවක් පවත්වමින් අමාත්‍ය ආචාර්ය අනිල් ජයන්ත ප්‍රනාන්දු එසේ සඳහන් කළේය. 

 

ඇඟලු‍ම්, ප්ලාස්ටික් සහ රබර් නිෂ්පාදන, ආහාර සැකසුම් නිෂ්පාදන ස්වර්ණාභරණ සහ රසායනික නිෂ්පාදන එම අපනයන භාණ්ඩ බව කී අමාත්‍යවරයා, මෙම බදු පැනවීම කිසියම් රටක් ඉලක්ක කර පැනවූවක් නොව ඇමෙරිකාව පොදුවේ ගත් තීරණයක් බව ද සඳහන් කළේය.

 

සියලු‍ම රටවල්වලට මෙම අනුපාතය අනුගමනය කර ඇති බවත්, එම රටවල් ප්‍රබලද නැද්ද, ඇමෙරිකාවත් සමග ළඟින් සම්බන්ධද නැද්ද, සාකච්ඡා පැවැත්වුවේද නැද්ද කියන කාරණා මෙම බදු පැනවවීමට අදාළ නොවන බවත්, ශ්‍රී ලංකාවේ බදු ප්‍රතිශතය ඉහළට යෑමට හේතුව ශ්‍රී ලංකාවේ අපනයන ප්‍රමාණය ඇමෙරිකාවේ සමස්ත ආනයන ප්‍රමාණයෙන් සියයට 0.1 ක් තරම් සුළු ප්‍රමාණයක් වීම බවත් ඒ මහතා කීය.

 

එවැනි බද්දයක් පැනවුවහොත් ශ්‍රී ලංකාවේ භාණ්ඩ තරගකාරිත්වයෙන් ඉවත් වන නිසා එම ක්ෂේත්‍රය පිළිබඳව අවධානය යොමුකළ යුතු බව කී අමාත්‍යවරයා, ඒ අනුව ඇමෙරිකාව සහ ශ්‍රී ලංකාව අතර වෙළෙඳ පරතරය අඩු කරගැනීමේ ක්‍රියාමාර්ග පිළිබඳව ඇමෙරිකාව පැත්තෙන් යෝජනා කර ඇති බව ද සඳහන් කළේය.

 

වෙළෙඳ පරතරය අඩු කිරීමට ගතයුතු ක්‍රියාමාර්ග මොනවාද, තීරු බදු ව්‍යූහය වෙනස්කිරීම් කළ හැකි ක්‍රම මොනවාද යන කරුණු පිළිබඳව අවදානය යොමු කිරීමට කමිටුවක් පත්කළ බවත් අමාත්‍යවරයා පැවසීය. 

 

එම බද්ද සම්බන්ධයෙන් තනි තනි රට පිළිබඳව නොදන්නා අතර, සමස්ත තීරණය ගැන පිළිබඳව පමණක් දන්නේ යැයි ඔවුන් පැවසූ අතර, මෙය රටවල් අතර සාකච්ඡා පවත්වමින් ගත් තීරණයක් නොව ඇමෙරිකාව ඔවුන්ගේ ප්‍රතිපත්ති අනුව ගත් තීරණයක් පමණක් බවත්, එම නියෝජිතයන් දැනුම් දුන් බවත් අමාත්‍යවරයා කීය.

 

චීනය, එංගලන්තය, ප්‍රංශය සහ ආජන්ටිනාව වැනි රටවල් කීපයක් ඇමෙරිකානු ජනාධිපතිවරයා සමඟ සාකච්ඡා කළ ද එම රටවල්වලට ද අදාළ සමීකරණයෙන්ම බදු පනවා ඇති බවත් ජපානය, ඉන්දියාව සහ එංගලන්තය යන රටවල්වලට සමීකරණයට අනුව පිළිවෙළින් 46 ක්, 52 ක් සහ 10 ක් ලෙස වෙළෙඳ පරතරය ලැබීම නිසා සියයට 23 ක්, සියයට 26 ක් සහ 10 ක් යෝජනා කර ඇති බවත් අමාත්‍ය අනිල් ජයන්ත ප්‍රනාන්දු මහතා පැවසීය.

 

ශ්‍රී ලංකාව ඇමෙරිකාව සමඟ සාකච්ඡා කළාද නැද්ද යන්න සමීකරණයට අදාළ නොවන අතර, එම බදු ප්‍රමාණය ප්‍රකාශයට පත්කිරීමෙන් පසුව සාකච්ඡා ආරම්භ කළ හැකි යැයි ද, අදාළ නියෝජිතයන් ලිපියකින් දැනුම්දී ඇති බවත් මේ සම්බන්ධයෙන් සමාජයට වැරදි මත ඉදිරිපත් කිරීම අනවශ්‍ය ගැටලු‍ නිර්මාණ කරන්නක් බවත් ඔහු සඳහන් කළේය. මුදල් ක්‍රමසම්පාදන සහ ආර්ථිත සංවර්ධන අමාත්‍යංශය පසුගිය 4 වැනිදා මේ සම්බන්ධයෙන් මාධ්‍ය නිවේදනයක් නිකුත කර තත්වය පැහැදිලි කළ බවත් එම මාධ්‍ය නිවේදනය තානාපතිවරයා හරහා ඇමෙරිකතානු රාජ්‍ය දෙපාර්තමේන්තුවට, ඇමෙරිකානු වෙළෙද කාර්යාලයට, ජාත්‍යන්තර මූල්‍ය අරමුදලට සහ ලෝක බැංකුවට ඉදිරිපත් කළ බවත් ඔහු කීය.

 

එම කාලය තුළ ඇමෙරිකානු වෙළෙඳ කාර්යාලයේ නියෝජිතයන් සමග සාකච්ඡා කළ අතර, හෙට තවත් සාකච්ඡාවක් පැවැත්වෙන බව ද ඔහු සඳහන් කළේය.

 

ඇමරිකා එක්සත් ජනපදය ඔවුන්ගේ විදේශ ප්‍රතිපත්තිය පාදකරගෙන ආනයනය කිරීමේදී අනුගමනය කරන තීරු බදු ව්‍යහුයක් ඉදිරිපත් කර ඇති අතර, එය රටවල් 185 ක් සම්බන්ධ ප්‍රතිපත්තිමය තීරණයක් බව කී අමාත්‍ය ආචාර්ය අනිල් ජයන්ත ප්‍රනාන්දු මහතා පැවසුවේ ඇමෙරිකාව පළමුවෙන්ම අප්‍රේල් මස 5 වැනිදා සිට ක්‍රියාත්මක කරන ‘‘බේස් ලයින්’ ලෙස හඳුන්වන සියයට 10 ක් අය කරන ලැයිස්තුව ඉදිරිපත් කළ බවත්ය.

 

ඉන් පසුව ඇමරිකාව සියයට 10 පාදක කරගෙන අනෙක් රටවල්වලට බදු ප්‍රතිශතය තීරණය කිරීමට ඇමෙරිකාවත් සෙසු එක් එක් රට සමඟ ඇති විදේශ වෙළෙඳ පරතය පාදක කරගත් බවත්, වෙළෙඳ පතරය සියයට 20 හෝ ඊට අඩුනම් එම සියයට 10 බලපැවැත්වෙන බවත් කීය.

 

පළමුවෙන්ම ඇමෙරිකාව සියලු‍ම රටවල්වලට සියටය 10 ක ප්‍රතිශතය ප්‍රකාශ කර, අප්‍රේල් 9 වැනිදා සිට වෙළෙඳ පතරය සියයට 20 වඩා වැඩිවන රටවල්වලට ගණනයක් ප්‍රකාශ කළ බවත්, එහි අරමුණ ආනයනයවලට තීරුබදු ව්‍යුහය ඉදිරිපත් කිරීම වුවද, එම ව්‍යූහය කසක් කිරීමට පාදක  කරගෙන ඇත්තේ තනි තනි රටත් සමඟ ඇති වෙළෙඳ අනුපාතය බවත් අමාත්‍යවරයා කීය.

 

ශ්‍රී ලංකාව සහ ඇමෙරිකාව අතර සියයට 88 ක වෙළෙඳ පරතයක් ඇති බවත්, 2024 වසරේ ශ්‍රී ලංකාව ඇමරිකානු එක්සත් ජනපදයට රුපියල් මිලියන 939,973 ක් වටිනා භාණ්ඩ අපනයනය කර ඇති අතර, ඇමෙරිකාවෙන් රුපියල් මිලියන 144,557 ක් පමණක් වටිනා භාණ්ඩ ආනයනය කර ඇති බවත් අමාත්‍යවරයා පැවසීය.

 

එම වෙනසෙන් රුපියල් මිලියන 939,973 බෙදු විට සියයට 88 ක් ලැබෙන අතර, ඉන් සියයට 50 ක් ලෙස පොදු අනුපාතයක් සියයට 44 ක් මෙරටට යෝජනා කර ඇති බවත් අමාත්‍යවරයා සඳහන් කළේය.

 

මුදල් නියෝජ්‍ය අමාත්‍ය ආචාර්ය හර්ෂණ සූරියප්පෙරුම සහ වෙළෙඳ, වාණිජ හා ආහාර සුරක්‍ෂිතා සහ සමූපකාර සංවර්ධන අමාත්‍යංශයේ ලේකම් කේ.එන්. විමලෙන්තුරරාජා යන මහත්වරු ද මෙම මාධ්‍ය හමුවේදී අදහස් දැක්වූහ.