(තිළිණි ද සිල්වා)
 
නව සංචාරක පුහුණු පාසල් 04 ක් ආරම්භ කිරීමට සැලසුම් කර ඇතැයි සංචාරක ඇමති ප්‍රසන්න රණතුංග මහතා පැවසීය.

දිස්ත්‍රික් මට්ටමින් සංචාරක පුහුණු පාසල් ස්ථාපිත කිරීමේ රජයේ තීරණය අනුව මෙම මෙම සංචාරක හෝටල්  පාසල් මේ වසරේදී පිහිටුවීමට අපේක්ෂා කරන බවද  සංචාරක අමාත්‍යවරයා කීය.

සංචාරක හෝටල් කළමනාකරණ ආයතනයේ ප්‍රගති සමාලෝචන රැස්වීමට එක්වෙමින් ඇමතිවරයා මේ බව සඳහන් කළේය.

කොළඹ ප්‍රධාන සංචාරක හෝටල් පාසලට අමතරව මහනුවර, කුරුණෑගල, අනුරාධපුරය, බණ්ඩාරවෙල, කොග්ගල, රත්නපුරය, පාසිකුඩා හා යාපනේ ප්‍රදේශ ආශ්‍රිතව හෝටල් පාසල් ක්‍රියාත්මක වුවද මෙරට සියලූම දිස්ත්‍රික්ක ආවරණය වන පරිදි හෝටල් පාසල් ආරම්භ කිරීමට රජය සැලසුම් කර ඇති බවද අමාත්‍යවරයා පෙන්වා දුන්නේය.
 
මෙම සංචාරක හෝටල් වල සංචාරක හා හෝටල් ක්ෂේත්‍රයට අදාල විවිධ පාඨමාලා ක්‍රියාත්මක වීමේදී  මෙම පාඨමාලා උපාධි පාඨමාලා දක්වා ඉහළ නැංවීමේ අවශ්‍යතාවයද ඇමතිවරයා මෙහිදී පෙන්වා දුන්නේය. විශ්ව විද්‍යාල ප්‍රතිපාදන කොමිසම සමග දැනටමත් මේ සම්බන්ධයෙන් සාකච්ඡා කරමින් සිටින බවද ඇමතිවරයා කීවේය.
 
දැනට ඇති පාඨමාලා වලට අමතරව සාමාන්‍යපෙළ සුදුසුකම් රහිත එහෙත් මෙම ක්ෂේත්‍රයේ රැකියා කරන හා එම ක්ෂේත්‍රයට උනන්දුවක් ඇති තරුණ තරුණියන් වෙනුවෙන් ආරම්භක ඩිප්ලෝමා පාඨමාලාවක් හදුන්වා දීමට කටයුතු කරන ලෙසද ඇමතිවරයා මෙහිදී බලධාරීන්ට උපදෙස් දුන්නේය.
 
සංචාරක අමාත්‍යංශය යටතේ ඇති සංචාරක හා හෝටල් කළමනාකරණ ආයතනය හෙවත් හෝටල් පාසල හෝටල් හා සංචාරක ක්ෂේත්‍රයට අදාල වෘත්තිකයන් බිහි කරන මෙරට එකම හා ප්‍රධානතම ආයතනය වේ.
 
සංචාරක අමාත්‍යංශයේ ‍ලේකම් එස්.හෙට්ටිආරච්චි, අතිරේක ලේකම්වරුන් වන වරුණ සමරදිවාකර,  දීපා සන්නසූරිය , සංචාරක හෝටල් කළමනාකරණ ආයතනයේ අධ්‍යක්ෂ ජනරාල් නදීකා වටලියැද්ද යන මහත්ම මහත්මීන් ඇතුළු නිලධාරීහු පිරිසක් මෙම අවස්ථාවට එක්ව සිටියහ.