භානුක අමරසිංහ 

සණස සංවර්ධන බැංකුවේ 2026 -2028 වසර සඳහා වන ඉදිරි උපායමාර්ගික සංවර්ධන සැලසුම් වෙනුවෙන් අවශ්‍ය තාක්ෂණික විශේෂඥතාව ලබා ගැනීම සඳහා නෙදර්ලන්තයේ Rabo Partnership B.V. සමගින් කටයුතු කරමින් සිටින බව බැංකුව පවසයි. 
බැංකුව මගින් 2024 වසර සඳහා නිකුත් කළ සිය වාර්ෂික වාර්තාව තුළ අදහස් දැක්වීමක් සිදු කරමින් එහි ප්‍රධාන විධායක නිලධාරී කපිල ආරියරත්න මහතා මේ බව සඳහන් කර සිටියි. 
මෙම Rabo Partnership B.V. සමාගම නෙදර්ලන්තයේ Rabobank හි පරිපාලිත සමාගමකි. එය මූල්‍ය අන්තර්ගතභාවය, ග්‍රාමීය සංවර්ධනය සහ තිරසාර ආහාර සුරක්ෂිතතාව යනාදිය සඳහා අවශ්‍ය පහසුකම් වෙනුවෙන් වන ජාලකරණය සහ නවෝත්පාදන විසඳම් ලබා දීම සම්බන්ධයෙන් ලොව ප්‍රමුඛතම සමාගමක් බව පවසයි. 
“කෘෂිකාර්මික අංශය සහ සාංගමික අංශය සමගින් පවතින අපගේ ශක්තිමත් සබැඳියාවත් සමගින් මෙම නව සංවර්ධන උපායමාර්ගය, විවිධාංගීකරණය සහ නව ආර්ථික කාණ්ඩ හරහා සණස සංවර්ධන බැංකුවේ ව්‍යාපාර පුළුල් කරණය සඳහා වඩාත් සහයෝගයක් දක්වාවි.“ යනුවෙන් ඒ මහතා වැඩිදුරටත් පවසයි.