ව්‍යවසායකයින් 15000ක් නිර්මාණය කිරීම අරමුණක්

දේශීය ආර්ථිකය සවිබල ගැන්වීමක්

දිවයිනේ ප්‍රමුඛතම රාජ්‍ය සංවර්ධන බැංකුවක් වන RDB බැංකුව රටේ ආර්ථිකය නගා සිටුවීම සඳහා ව්‍යවසායකයන් දිරි බල ගැන්වීමේ දැවන්ත කාර්යයක නිරතව සිටි. ශාඛා 272 ක් පුරා විහිදුණු 3000 කට වඩා සේවක පිරිසකින් යුතු RDB බැංකුව ආර්ථික සංවර්ධනයේ පෙර ගමන්කරුවකු ලෙස වසර 40 කට ආසන්න කාලයක් පුරා සුවිශාල කාර්ය භාරයක් ඉටු කරමින් සිටී.

ව්‍යවසායක ආර්ථිකයක් බිහි කිරීමේ රජයේ සංකල්පය වන “ව්‍යවසායක උන්මාදයක්” ඇති කිරීමේ වැඩසටහනට සමගාමීව ව්‍යවසායකයන් 15,000 ක් නිර්මාණය කිරීමේ වැඩසටහන RDB බැංකුව විසින් ආරම්භ කර ඇත.

“ආර්ථික සංග්‍රාමයේ RDB මෙහෙයුම් ක්‍රියාන්විතය – ව්‍යවසායකයන් 15,000ක බලකායක් ජාතික ආර්ථිකයට” යන තේමාව ඔස්සේ සෑම ග්‍රාම සේවක කොට්ඨාසයකින්ම අවම වශයෙන් එක් ව්‍යවසාකයෙක් බැඟින් ව්‍යවසායකයන් 15,000 ක් වසරක් තුළ බල ගැන්වීම මෙම වැඩසටහනේ මූලික අරමුණ වේ. එසේ ගොඩනැගෙන ව්‍යවසායකයන් 15,000 වටා ධීවර, කෘෂි, කර්මාන්ත, පශු සම්පත් වැනි නිෂ්පාදන හා සේවා ක්ෂේත්‍ර නියෝජනය කරමින් ප්‍රධාන ව්‍යවසායකයා වටා ගොනුවුණු ව්‍යවසායක පොකුරක් නිර්මාණය කර ග්‍රාමීය ව්‍යවසායකත්ව සංවර්ධනය ඉලක්ක සපුරා ගනිමින් දේශීය ආර්ථිකය සවිබල ගැන්වීම මෙම වැඩසටහනේ ඉලක්කය වේ.

ව්‍යවසායකයින් සඳහා ණය ප්‍රතිපාදන ලබා දීමට අමතරව මුල්‍ය පාලනය හා විනය, නවීන තාක්ෂණික ක්‍රම, නව වෙළඳපොල අවස්ථා සහ අත්‍යාවශ්‍ය පුහුණු වැඩසටහන් ක්‍රියාත්මක කිරීම මඟින් මුල්‍යමය වශයෙන් හා දැනුමින් සන්නද්ධ වූ ව්‍යවසායක බලකායක් නිර්මාණය කිරීමද මෙහිදී සිදු වීණි.

තවද ව්‍යවසායක ප්‍රජාවගේ නිෂ්පාදන නොමිලේ අලෙවි කිරීම සඳහා වෙබ් අඩවියක් හදුන්වා දීමටද බැංකුව කටයුතු කර ඇත.

මෙම වැඩසටහනේ ජාතික සාමාරම්භක උළෙල RDB බැංකුවේ සභාපති ලසන්ත ප්‍රනාන්දු මහතාගේ සහ සාමාන්‍යාධිකාරි ජනිත ප්‍රියශාන්ත මහතාගේ ආරාධනයෙන් කර්මාන්ත හා ව්‍යවසායකත්ව සංවර්ධන ආමාත්‍ය සුනිල් හදුන්නෙත්ති මැතිතුමාගේ ප්‍රධානත්වයෙන් මාතරදී පැවැත්විණි. මෙහිදී දකුණු පළාතේ ග්‍රාමසේවා කොට්ඨාස 250ක් නියෝජනය කරමින් ව්‍යවසායක ව්‍යවසායිකාවන් 250ක් සඳහා රු.මිලියන 500කට අධික ණය පහසුකම් ප්‍රදානය කෙරුණි.