මෙරට Premium යතුරුපැදි කාණ්ඩයේ නව පෙරළියක් ඇති කරමින් යළිත් ඩේවිඩ් පීරිස් මෝටර් කම්පැනි (ප්‍රයිවට්) ලිමිටඩ් විසින් මෙරටට හඳුන්වා දුන් KTM මෝටර් සයිකල් තවදුරටත් මෙරට මෝටර් සයිකල් ලෝලීන්ට සමීප කරවමින් KTM Peliyagoda නවතම ප්‍රදර්ශනාගාරය පසුගියදා අංක 389, මීගමුව පාර, පෑලියගොඩ යන ස්ථානයේදී විවෘත කෙරුණි.
ඩේවිඩ් පීරිස් මෝටර් කම්පැනි (ප්‍රයිවට්) ලිමිටඩ් අධ්‍යක්ෂ සහ ප්‍රධාන මෙහෙයුම් නිලධාරී නාලක මඩුගල්ලේ මහතා අතින් නව ප්‍රදර්ශනාගාරය විවෘත කෙරුණු අතර ඒ සඳහා ප්‍රධාන නිලධාරී - වාහන විකුණුම් ලක්මාල් ද සිල්වා, අංශ භාර කළමනාකරු - වාහන විකුණුම් අකිල ඇලබොඩගේ ඇතුළු නිලධාරී පිරිසක් සහභාගී වූහ. 
මෙම අති නවීන ප්‍රදර්ශනාගාරය වෙත පැමිණෙන පාරිභෝගිකයන්ට Duke 160, Duke 250 සහ Adventure 390 X ඇතුළු සියලු‍ KTM මෝටර් සයිකල් මාදිලිවල අත්දැකීම ලබාගැනීමේ හැකියාව ඇත.
ඩේවිඩ් පීරිස් මෝටර් කම්පැනි (ප්‍රයිවට්) ලිමිටඩ් (DPMC) පස් වසරක විරාමයකින් පසු KTM මෝටර් සයිකල් යළි පසුගිය පෙබරවාරි මාසයේදී මෙරටට හඳුන්වා දුන් අතර එමගින් මෙරට පාරිභෝගිකයන් වෙත ගෝලීය මට්ටමේ මෝටර් සයිකලයක අත්දැකීම ලබාගැනීමේ අවස්ථාව හිමිවුණි. 
ගෝලීය වශයෙන් යුරෝපයේ අංක එකේ රේසිං මෝටර් සයිකල් සන්නාමය වන KTM, MotoGP සහ Dakar Rally වැනි ජාත්‍යන්තර තරගාවලි හරහා තහවුරු කළ සිය රේසිං උරුමය සහ ඉංජිනේරු විශිෂ්ටත්වය ලංකාවට රැගෙන එන අතර මෙවර හඳුන්වා දුන් Duke 160, Duke 250 සහ Adventure 390 X යන මාදිලි ත්‍රිත්වය ඒ සඳහා කදිම උදාහරණයකි. මෙම සෑම මාදිලියක්ම ක්‍රියාකාරීත්වය, වේගය සහ නවීන තාක්ෂණය යන අංගවලින් සමන්විතය.
KTM මෝටර් සයිකල් ආක්‍රමණශීලී පෙනුමකින් සහ WP APEX USD සස්පෙන්ෂන්, 6-speed ගියර් පද්ධතිය සහ දියර සිසිලන එන්ජින් වැනි නවීන තාක්ෂණික අංගවලින් සමන්විත වේ. තවද තෝරාගත් මාදිලි අනුව Supermoto ABS, Ride-by-wire, Slipper clutch සහ Quickshifter+ වැනි උසස් පහසුකම් මෙන්ම නවීන TFT වර්ණ සංදර්ශක හරහා රියැදුරුට උපරිම ආරක්ෂාවක් සහ උද්‍යෝගිමත් ධාවන අත්දැකීමක් ලබා දෙයි.