• සාර්ව ආර්ථික ප්‍රතිපත්තිවල දිශානතිය වෙනස් නොවීම සතුටට කරුණක්

2025 වසර වෙනුවෙන් ජනාධිපතිවරයා ඉදිරිපත් කළ අයවැය IMF අයවැයක් ලෙස ඇතැමුන් හැඳින්වුවත්, එය රටට සුබදායක අයවැයක් බව මහ බැංකු අධිපති ආචාර්ය නන්දලාල් වීරසිංහ මහතා පැවසීය.

පශ්චාත් අයවැය සාකච්ඡාවට එක්වෙමින් මහ බැංකු අධිපතිවරයා ඊයේ මේ බව ප්‍රකාශ කළේය. එහිදී වැඩිදුරටත් අදහස් දැක්වූ මහ බැංකු අධිපතිවරයා මෙසේද පැවසීය.

මෙවර ඉලක්ක දෙස බැලු‍වාම ඒ පිළිබඳ වැඩි විශ්වාසයක් තබන්න පුළුවන්. රුපියල් ට්‍රිලියන 5ක ආදායම් ඉලක්කයක් සහ සියයට 2.3ක ප්‍රාථමික අතිරික්තයක් අපේක්ෂා කළත්, මගේ අපේක්ෂාව අනුව එය ප්‍රමාණය ඉක්මවා ගිය ක්‍රියාකාරීත්වයක්. ඒ වගේම රජයේ සුරැකුම්පත් සඳහා වූ කෙටිකාලීනව පැන නගින පීඩනය අවශෝෂණය කරගැනීමට ආරක්ෂණ යෙදීමද වැදගත්. එමගින් අපේ මූල්‍ය ප්‍රතිපත්තිය අනුව ස්ථාවර පොලී අනුපාත පවත්වාගෙන යාමට හැකියාවක් ලැබේවි. 

ඇතැමුන් කියන විදියට IMF අයවැයක් ගැන කතා කළොත්, වසර ගණනක් තිස්සේ IMF  සමග සාකච්ඡාවලට සහභාගී වූ අයකු හැටියට මේ වතාවේ රටක් විදියට සමස්ත ආර්ථික ස්ථාවරත්වයක් උදෙසා නිවැරදි මාර්ගයේ ගමන් කිරීමට බාහිර පාර්ශ්වකරුවන්ට ලබා දී ඇති ප්‍රතිඥා වෙනස් වී නොමැති බව මට කියන්න පුළුවන්. පරිපාලනයේ වෙනසක් සිදුවුවත් සාර්ව ආර්ථික ප්‍රතිපත්තිවල දිශානතිය වෙනස් නොවීම සතුටට කරුණක්. මගේ අදහසේ හැටියට එය අනිවාර්යයෙන් සිදුවිය යුත්තක්. ජාත්‍යන්තර මූල්‍ය අරමුදලේ සමස්ත සාර්ව ආර්ථික ස්ථාවරකරණ වැඩසටහනේ පරාමිති අනුව කටයුතු කිරීම රජයේ වගකීමකි. එය සුබවාදී ලකුණක් හැටියටයි මම දකින්නේ. මම දකින විදියට මේක IMF අයවැයක් නොවෙයි. රටට හොඳ අයවැයක්.