හැටන් නැෂනල් බැංකුව 2025 වසරේ පළමු කාර්තුවේදී අඛණ්ඩ වර්ධන වේගයක් පවත්වා ගනිමින් සමූහයේ බදු පසු ලාබය (PAT) පසුගිය වසරට සාපේක්ෂව සියයට 49 ක සහ බැංකුවේ බදු පසු ලාබය සියයට 64 ක වර්ධනයක් පෙන්නුම් කර ඇත. ඒ අනුව මෙම කාල පරිච්ඡේදයේදී සමූහයේ සහ බැංකුවේ බදු පසු ලාබය පිළිවෙළින් රු. බිලියන 11.1 ක් සහ රු. බිලියන 10.2 ක් විය.

2024 වසරේ අදාළ කාල පරිච්ඡේදයට සාපේක්ෂව පොලී අනුපාත අඩු වුවද, 2025 වසරේ පළමු කාර්තුවේදී බැංකුවේ ශුද්ධ පොලී ආදායම (NII) පසුගිය වසරට සාපේක්ෂව රු. බිලියන 23.7 ක් දක්වා සියයට 7.7 කින් වර්ධනය විය. බැංකුවේ ණය පොත පසුගිය වසරට සාපේක්ෂව රු. බිලියන 159 කින් ඉහළ ගියද, පොලී ආදායම පසුගිය වසරට සාපේක්ෂව සියයට 14.4 කින් පහත වැටුණි. කෙසේ වෙතත්, CASA (ජංගම සහ ඉතුරුම් ගිණුම්) තැන්පතු ඉහළ යාම හේතුවෙන් බැංකුවේ පොලී වියදම් පසුගිය වසරට සාපේක්ෂව සියයට27.1 කින් පහත වැටුණි. එහි ප්‍රතිඵලයක් ලෙස බැංකුවේ ශුද්ධ පොලී ආදායම (NII) වර්ධනය විය.

මෙම මූල්‍ය කාර්යසාධනය පිළිබඳව අදහස් දක්වමින් HNB සභාපති නිහාල් ජයවර්ධන මහතා මෙසේ පැවසුවේය. “රටේ ආර්ථිකය ස්ථාවරත්වය කරා අඛණ්ඩව ගමන් කරන බැවින්, 2025 පළමු කාර්තුවේදී බැංකුවේ ලබාගත් මෙම කාර්ය සාධනය පිළිබඳව මා සතුටු වෙනවා. විශේෂයෙන් අසීරු කාලවලදී අපගේ ජනතාවට සහ ව්‍යාපාර සඳහා සැමවිටම ප්‍රගතියේ හවුල්කරුවකු ලෙස HNB මෙරට ආර්ථිකයට වැදගත් දායකත්වයක් ලබා දී තිබෙනවා.

බැංකුවේ ශුද්ධ ගාස්තු සහ කොමිස් ආදායම පසුගිය වසරට සාපේක්ෂව සියයට 17.0 කින් ඉහළ ගිය අතර ඉහළ ක්‍රෙඩිට් හා ඩෙබිට් කාඩ්පත් ගනුදෙනු සහ ඩිජිටල් බැංකු සේවා භාවිතය ඉහළ යාම මෙයට ප්‍රධාන වශයෙන් හේතු විය. මුදල් රහිත ආර්ථිකයක් ප්‍රවර්ධනය කිරීමේ HNB  හි අඛණ්ඩ කැපවීම මෙයින් පෙන්නුම් කරයි. මීට අමතරව ශ්‍රී ලංකා රුපියල අවප්‍රමාණය වීම හේතුවෙන් අදාළ කාල පරිච්ඡේදය තුළ ප්‍රධාන වශයෙන් විදේශ විනිමය ආදායමෙන් ලැබුණු අනෙකුත් ආදායම් රු. බිලියන 2.3 දක්වා ඉහළ ගියේය. 2024 වසරේ අදාළ කාල පරිච්ඡේදයේදී බැංකුව රු. බිලියන 2.1 ක අලාභයක් වාර්තා කර තිබුණි.