භානුක අමරසිංහ
මෙරට ප්‍රමුඛතම ආයෝජන බැංකු සමාගමක් වන Acuity Partners (Pvt) Ltd හි සියයට 100 ක කොටස් හිමිකාරීත්වය අත්පත් කරගැනීම සඳහා එහි සම කොටස් හිමිකරුවා වන DFCC  බැංකුව සමගින් පැමිණි නව එකඟතාව සාර්ථකව අවසන් කළ බව හැටන් නැෂනල් බැංකුව (HNB) පවසයි.
ඊයේ (16දා) කොළඹ කොටස් හුවමාරුව වෙත ලිපි මගින් දැනුම් දෙමින් හැටන් නැෂනල් බැංකුව සහ DFCC බැංකුව මේ බව සඳහන් කරයි. ඒ අනුව මෙම ගනුදෙනුව සම්බන්ධයෙන් වන අලෙවි කිරීමේ සහ මිලදී ගැනීමේ එකඟතාවට පිවිසීමත් ඊයේ දිනයේදී සිදුව ඇත.
මෙහිදී DFCC බැංකුව සතුව ඇති Acuity Partners (Pvt) Ltd සමාගමෙහි සියයට 50 ක කොටස් හිමිකාරීත්වය HNB  බැංකුව වෙත හුවමාරු කිරීම නියාමන ආයතනවල අනුමැතිය හිමිවීමෙන් අනතුරුව ඉදිරියේදී සිදුවනු ඇති බවත් දෙපාර්ශ්වයම පවසයි.

පසුගිය වසරේ සැප්තැම්බර් 02 වැනිදා මෙම අත්පත් කරගැනීම පිළිබඳව පළමුවරට අනාවරණය කෙරිණි. කෙසේ වෙතත් එම අදහස ඉවත් කරගත් බව හැටන් නැෂනල් බැංකුව (HNB) එම වසරේ නොවැම්බර් 01 වැනිදා ප්‍රකාශ කළේය. මේ අතර දෙසැම්බර් 16 වැනිදා නිවේදනයක් නිකුත් කරමින් අදාළ එකඟතාව සම්බන්ධයෙන් පැවැති කාරණා සහ කොන්දේසි වෙනස් කරමින් දෙපාර්ශ්වය යළිත් එකඟතාවකට පිවිසෙන බව සඳහන් කළේය.
Acuity Partners  සමාගම හැටන් නැෂනල් බැංකුවෙහි සහ DFCC  බැංකුවෙහි ඒකාබද්ධ හවුල්කාරීත්වයෙන් ස්ථාපිත කෙරුණකි. එහි කොටස් හිමිකාරීත්වයෙන් සියයට 50 ක් හැටන් නැෂනල් බැංකුව වෙතත් ඉතිරි සියයට 50 DFCC  බැංකුව වෙතත් බෙදී ගොස් තිබේ.
මෙහිදී රුපියල් බිලියන 7ක මුදලකට අදාළ හිමිකාරීත්වය අලෙවි කිරීමට දෙපාර්ශ්වයම එකඟතාවට පත්වූ බවටත් මුල් වාර්තාවල සඳහන් විය.
එසේම මෙම අත්පත් කරගැනීමෙන් අනතුරුව HNB බැංකුව Acuity Partners (Pvt) Ltd  සමාගම හරහා සිය ආයෝජන බැංකු ව්‍යාපාර කටයුතු පවත්වාගෙන යන බවත් වැඩිදුරටත් සඳහන් වී තිබේ.