භානුක අමරසිංහ

සියපත ෆිනෑන්ස් පීඑල්සී සමාගමේ නව ප්‍රධාන විධායක නිලධාරිවරයා ලෙස මතීෂ හේවාවිතාරණ මහතා නම් කරන බව එම සමාගම පවසයි. පසුගිය අගෝස්තු 26 වැනිදා පැවැත්වුණු සමාගමේ අධ්‍යක්ෂ මණ්ඩල හමුවේදී අදාළ නම් කිරීම ඒකමතිකව ස්ථිර කර තිබේ. එසේම පසුගිය දා මහ බැංකුව ද එම නම් කිරීමට අනුමැතිය ලබා දී තිබේ. 

ඒ අනුව ඔක්තෝබර් 01 වැනිදා සිට ඒ මහතා සියපත ෆිනෑන්ස්හි ප්‍රධාන විධායක නිලධාරී (නම් කළ) ලෙස පත් කෙරෙන බව සමාගම පවසයි. හේවාවිතාරණ මහතා මේ වනවිට එම සමාගමේ ප්‍රධාන ක්‍රමෝපායික නිලධාරීවරයා ලෙස කටයුතු කරයි. මේ වනවිට සියපත ෆිනෑන්ස් පීඑල්සීහි ප්‍රධාන විධායක නිලධාරී/කළමනාකාර අධ්‍යක්ෂවරයා ලෙස කටයුතු කරන ආනන්ද සෙනෙවිරත්න මහතා මෙම වසර අවසානයේදී විශ්‍රාම යෑමත් සමගින් හිස්වන ධුරය සඳහා හේවාවිතාරණ මහතා නම් කර තිබේ. ඒ මහතා සතුව වසර 20කට අධික කාලයක් පුරා මූල්‍ය සේවා කර්මාන්තය තුළ අත්දැකීම් සහිත බව පවසයි. ඒ මහතා සියපත ෆිනෑන්ස් පීඑල්සී වෙත සම්බන්ධ වී ඇත්තේ 2005 වසරේදීය. සියපත ෆිනෑන්ස් සම්පත් බැංකුවේ පූර්ණ අනුබද්ධිත මූල්‍ය සමාගමකි.