ඒකාබද්ධ සෞඛ්‍ය ආරක්ෂණය සහ පාලනය ශක්තිමත් කිරීම සඳහා වන විශ්ව සෞඛ්‍ය ආවරණ වැඩසටහන සඳහා ශ්‍රී ලංකා රජය සහ ආසියානු සංවර්ධන බැංකුව අතර එක්සත් ජනපද ඩොලර් මිලියන 100ක ණය ගිවිසුමකට පිවිසීම පසුගියදා සිදු විය. 

එසේම එම බැංකුවේ වසංගත වැළැක්වීම, සූදානම සහ ප්‍රතිචාර භාර අරමුදල (වසංගත අරමුදල) මගින් ඇමෙරිකානු එක්සත් ජනපද ඩොලර් මිලියන 6.9ක ප්‍රදානයක් ලබාදීමද මීට සමගාමීව සිදු කර තිබේ. 

මෙහිදී අදාළ ණය සහ ප්‍රදාන ගිවිසුම්වලට අත්සන් තැබීම මුදල්, ක්‍රමසම්පාදන හා ආර්ථික සංවර්ධන අමාත්‍යාංශ ලේකම් ආචාර්ය හර්ෂණ සූරියප්පේරුම සහ ආසියානු සංවර්ධන බැංකුවේ ශ්‍රී ලංකා නේවාසික අධ්‍යක්ෂ ටකාෆුම් කඩෝනො අතර සිදුව තිබේ. 

ආසියානු සංවර්ධන බැංකුවේ සාමාන්‍ය පොදු ප්‍රාග්ධන සම්පත් යටතේ ලබා ගනු ලබන ඩොලර් මිලියන 100ක ඉහත ණය මුදල මගින් විශ්වීය සෞඛ්‍ය ආවරණය සහතික කිරීම යොදා ගන්නා බව පැවසෙයි.