තිරසාර මුල්‍ය පද්ධතියක් ප්‍රවර්ධනය කිරීම අරමුණක්
ගිණුම්වලට අනවසර පිවිසීම්වලට ආරක්ෂාවක්
ගෙවීම් සේවා බලපත්‍ර ලබාදීමේ ක්‍රමය සමාලෝචනයට

රජයේ ඩිජිටල් ගෙවීම් වේදිකාව (Government Digital Payment Platform - GDPP) සම්බන්ධයෙන් 2024 වසරේදී සිදු කරන ලද සාර්ථක නියමු පරීක්ෂණවලින් පසුව 2025 වසරේදී ක්‍රියාත්මක වනු ඇතැයි මහ බැංකුව පවසයි.

ඩිජිටල්කරණය වූ දත්ත ගබඩා නොමැති රාජ්‍ය ආයතනවලට අන්තරජාල බැංකුකරණය/ජංගම ගෙවීම් යෙදුම් හරහා මහජනතාවගේ තත්කාලීන ගෙවීම ලබා ගැනීමට සහාය වන ලෙස මෙම වේදිකාව නිර්මාණය කර තිබේ.
ශ්‍රී ලංකා මහ බැංකුව විසින් 2025 සහ ඉදිරිය සඳහා ශ්‍රී ලංකා මහ බැංකුවේ ප්‍රතිපත්ති ප්‍රකාශය ඉදිරිපත් කරමින් මෙම කරුණු සඳහන් කර සිටියි.

විශේෂයෙන්ම මහ බැංකුව 2024 වසර තුළදී කලාපීය සහ වෙනත් රටවල්වල ගෙවීම් ජාල සමග ඒකාබද්ධවීම මගින් ජාතික ගෙවීම් පද්ධති යටිතල පහසුකම් තවදුරටත් වැඩිදියුණු කිරීම සිදු කළ බව ද මහ බැංකුව පවසයි.
එසේම ශ්‍රී ලංකාවේ ගෙවීම් යටිතල පහසුකම් ජාත්‍යන්තර ප්‍රමිතීන්ට අනුකූල බව සහතික කිරීමේ අරමුණින්, නව තත් කාලීන දළ පියවීම් පද්ධතියක් (Real Time Gross Settlement System RTGS හඳුන්වාදීමටද මහ බැංකුව කටයුතු කර තිබේ.

“අන්තර් බැංකු ගෙවීම් පද්ධති වෙත සාමාජිකයන් සම්බන්ධ කරවීමේ ක්‍රියාපටිපාටිය මෙන්ම ගෙවීම් සේවා සඳහා බලපත්‍ර ලබාදීමේ ක්‍රියාපටිපාටිය සමාලෝචනය කිරීමටද මහ බැංකුව මේ වසරේදී අපේක්ෂා කරන බවද පවසයි.

“2025 වසරේ ජනවාරි මාසයේ සිට LANKAQR සඳහා වෙළෙඳ වට්ටම් අනුපාතය සියයට 0.5 සිට සියයට 1ක් දක්වා ප්‍රතිස්ථාපනය කරනු ලබන අතර, එමගින් මූල්‍ය ආයතන සහ මූල්‍යතාක්ෂණ ආයතන (FinTechs) LANKAQR සක්‍රියව ප්‍රවර්ධනය කිරීමට දිරිමත් කරනු ඇත.“ යනුවෙන් මහ බැංකු අධිපතිවරයා මේ පිලිබඳව සඳහන් කළේය.

එපමණක් නොව ඩිජිටල් ගෙවීම් ආශ්‍රිතව මහජනතාවට ඇති ගැටලු‍ හඳුනා ගනිමින්, වංචා සිදුවන ආකාරය නිරීක්ෂණය කිරිම සහ අවශ්‍ය මාර්ගෝපදේශ නිකුත් කිරීමෙන් මහජන විශ්වාසය සුරක්ෂිත කිරිමටද මහ බැංකුව කැපවී සිටින බවද අවධාරණය කර සිටියි.

“මෙහි අදියරක් ලෙස ගෙවීම් යෙදුම් හරහා ගනුදෙනුකරුවන්ගේ ජංගම සහ ඉතුරුම් ගිණුම් වෙත අනවසරයෙන් සිදු කරන ප්‍රවේශවලින් ආරක්ෂා කිරීම මහ බැංකුව 2025 වසරේ මාර්තු මාසයේ සිට ක්‍රියාත්මක වන පරිදි 2024 වසරේදී චක්‍රලේඛයක්ද නිකුත් කර තිබෙන බවද මහ බැංකු අධිපතිවරයා මෙහිදී පවසා සිටියේය.

විශේෂයෙන්ම වඩාත් විනිවිදභාවයකින් යුතු සහ පාරිභෝගික කේන්ද්‍රීය තිරසාර මූල්‍ය පද්ධතියක් ප්‍රවර්ධනය කිරීම මහ බැංකුවේ අරමුණ බවත්, ඒ සඳහා 2025 වසරේදී සහ ඉන් ඔබ්බට උපාය මාර්ගික මුලපිරීම් මාලාවක් සැලසුම් කර ඇතැයිද මහ බැංකුව වැඩිදුරටත් සඳහන් කර සිටියි.