භානුක අමරසිංහ 
ලංකා බැංකුවේ නව අධ්‍යක්ෂ මණ්ඩල සාමාජිකයකු ලෙස මහාචාර්ය ආනන්ද කිත්සිරි ජයවර්ධන මහතා පත් කරගත් බව එම බැංකුව පවසයි. ඒ අනුව නොවැම්බර් 14 වැනිදා සිට බලාත්මක වන පරිදි ඒ මහතා බැංකුවේ ස්වාධීන, විධායක නොවන අධ්‍යක්ෂවරයකු ලෙස පත් කරගෙන තිබේ.  
සාමාජිකයන් පස් දෙනකුගෙන් යුත් විශේෂිත තේරීම් කමිටුවක් මගින් ලබාදුන් නිර්දේශ අනුව මුදල්, සැලසුම් සහ ආර්ථික සංවර්ධන අමාත්‍යාංශය මගින් අදාළ නව පත් කිරීම සිදු කර තිබේ.  
මහාචාර්ය ජයවර්ධන මහතා සතුව බැංකුකරණය, මූල්‍ය, නිෂ්පාදන, රක්ෂණ, අධ්‍යාපනය සහ විද්‍යා හා තාක්ෂණ යන රජයේ ආයතන සහ පෞද්ගලික සමාගම් පාලනය පිළිබඳව අත්දැකීම් පවතින බව සඳහන් වෙයි. එසේම ඒ මහතා වරලත් ඉංජිනේරුවරයකුද වෙයි. 
ජයවර්ධන මහතා මීට පෙර කොමර්ෂල් බැංකුවේ සභාපතිවරයා ලෙසින්ද කටයුතු කළේය. එසේම අද වනවිට HNB ඇෂුවරන්ස් පීඑල්සී, ප්‍රයිම් ලෑන්ඩ්ස් රෙසිඩෙන්සීස් පීඑල්සී යන සමාගම්හිද අධ්‍යක්ෂ මණ්ඩල සාමාජිකයකු ලෙස කටයුතු කරයි.