සුජිත් හේවාජුලිගේ

ශ්‍රී ලංකා ඔස්ට්‍රේලියා ඒකාබද්ධ සමාගමක් වන Techscrolll  ආයතනය ශ්‍රී ලංකාවේ බැඳුම්කර වෙළෙඳපොළ කාර්යක්ෂම කිරීමට iBond නමින් වැඩි දියුණු කළ නව මෘදුකාංගයක් හඳුන්වා දී ඇත.

භාණ්ඩාගාර බැඳුම්කර සහ භාණ්ඩාගාර බිල්පත් ඇතුළු රජයට නව මූල්‍ය ආයෝජන ගැනීමට හැකි වැඩපිළිවෙළ සඳහා වඩාත් කාර්යක්ෂම සහ ඉක්මනින් තීන්දු තීරණ ගත හැකි, වඩාත් ආරක්ෂාකාරී විනිවිදභාවයෙන් යුතු මෙහෙයුම් ක්‍රමවේදයක් මෙම iBond මත පදනම් වූ මෘදුකාංග පද්ධතියේ සහාය ගනිමින් ඇති කර ගත හැකිවීම විශේෂ කරුණක් බව සඳහන්වේ.

රජයේ විවිධ අමාත්‍යාංශ, දෙපාර්තමේන්තු හා ආයතන අතර පවතින මනාව සම්බන්ධීකරණය නොවීමේ දුර්ගුණය නැති කිරීමට, රජයේ ආයතනවල සේවා කාර්යක්ෂම කිරීමට, සන්නිවේදන බාධා සහ හිඩැස් අවම කිරීමට, ප්‍රමාදය දුරු කිරීමට මෙම නවෝත්පාදන මෙහෙයුම් පද්ධතිය භාවිතයට ගැනීමෙන් හැකියාව ලැබෙනු ඇති බවත් ජනාධිපති අනුර කුමාර දිසානායක මහතාගේ නායකත්වයෙන් ආරම්භවී ඇති රට ඩිජිටල්කරණය කිරීමේ ජාතික වැඩපිළිවෙළ ක්‍රියාත්මක වන මොහොතක එම කටයුතු වඩාත් වේගවත් කිරීමට මෙම මධ්‍යගත ඒකාබද්ධ තාක්ෂණික නවෝත්පාදනය සොයා ගැනීම ඉතා වැදගත් බවත් රුහුණු විශ්වවිද්‍යාලයේ ඉංජිනේරු පීඨයේ ජ්‍යෙෂ්ඨ කථිකාචාර්ය සහ Techscrolll පෞද්ගලික සමාගමේ ජ්‍යෙෂ්ඨ උපදේශක ආචාර්ය ප්‍රභාත් වීරසිංහ මහතා ප්‍රකාශ කළේය.

දේශීය සහ ජාත්‍යන්තර වශයෙන් ශ්‍රී ලංකාවට බැඳුම්කර වෙළෙඳපොළට පහසුවෙන් පිවිසීමට හැකි නව මෘදුකාංගය හඳුන්වා දීමෙන් රජයට එක්සත් ජනපද ඩොලර් බිලියනයක ආයෝජනයක් පවා ඉතා පහසුවෙන් සපයා ගැනීමට හැකියාව ලැබෙන බවත් රජයේ තාක්ෂණික වෙළෙඳපොළේ වටිනාකමද එමගින් ඩොලර් බිලියනයකින් ඉහළ යන බවත් වීරසිංහ මහතා ප්‍රකාශ කළේය.