දරිද්‍රතා විශ්ලේෂණ මධ්‍යස්ථානයේ විධායක අධ්‍යක්ෂවරයා ලෙස ආචාර්ය සිරිමල් අබේරත්න මහතා පත් කර ඇත. අබේරත්න මහතා ලබන පෙබරවාරි පළමු වැනිදා සිට සිය රාජකාරි ආරම්භ කරනු ඇති බව දරිද්‍රතා විශ්ලේෂණ මධ්‍යස්ථානය (CEPA) නිකුත් කළ නිවේදනයක දැක්වෙයි.
කීර්තිමත් ආර්ථික විද්‍යාඥයකු සහ චින්තන නායකයකු වන අබේරත්න මහතා, දරිද්‍රතා විශ්ලේෂණ මධ්‍යස්ථානය සමඟ නිරන්තරයෙන් සම්බන්ධ වී සිටි අයෙකි. ඒ, ශාස්ත්‍රීය වශයෙන්, ප්‍රතිපත්ති සම්පාදනයෙන් සහ පර් යේෂණ පිළිබඳ විශේෂඥ දැනුම බෙදා දෙමිනි.
කොළඹ විශ්වවිද්‍යාලයේ ආර්ථික විද්‍යාව පිළිබඳ විශිෂ්ට මහාචාර්යවරයකු ද වන ආචාර්ය අබේරත්නට කොළඹ විශ්වවිද්‍යාලයේ  BA ගෞරව උපාධියක් ද හිමිය. හේග් නුවර කේන්ද්‍රකොටගත් සෝෂල් ස්ටඩීස් උසස් අධ්‍යාපන ආයතනයෙන් උපාධියක් ද, ඇම්ස්ටර්ඩෑම් නිදහස් විශ්වවිද්‍යාලයෙන් ආචාර්ය උපාධියක් ද ඔහු සතුය. ජාත්‍යන්තර වෙළඳාම, ප්‍රතිපත්ති ප්‍රතිසංස්කරණ සහ ග්‍රාමීය සංවර්ධනය යන ක්ෂේත්‍ර සඳහා ඔහුගේ දායකත්වය පුළුල් පර් යේෂණ, ප්‍රකාශන සහ මාධ්‍ය විවරණ තුළින් මනාව ලේඛනගත තිබීම ද විශේෂත්වයකි.
අබේරත්න මහතා 2022 වසරේ සිට ශ්‍රී ලංකා මහ බැංකුවේ පාර්ශ්වකරුවන්ගේ සම්බන්ධීකරණ කමිටුවේ  (SEC) සභාපති ලෙස ද 2017-2021 සිට මුදල් ප්‍රතිපත්ති උපදේශක කමිටුවේ (MPCC) සභාපති ලෙස ද කටයුතු කර ඇත. 
එමෙන්ම ඔහු UNDP ජෛව විවිධත්ව මූල්‍යකරණය සම්බන්ධයෙන් උපදේශකයකු ලෙස කටයුතු කර ඇති අතර, ඕස්ට්‍රේලියානු ජාතික විශ්වවිද්‍යාලය සහ ජපානයේ Ryukoku විශ්වවිද්‍යාලය ඇතුළු ගෝලීය වශයෙන් පිළිගත් ආයතනවල රැසක් සමඟ එක් වී කටයුතු කර ඇත.