යොහාන් භාසුර

ශ්‍රී ලංකා ආර්ථිකය මුදල්වලට වියදම් කරන ප්‍රමාණය සියයට 1.5 ක් වුවත් ඩිජිටල්කරණ හරහා සියලු‍ ගෙවීම් කරන තත්වයට දියුණු කළ හොත් මුදල්වලට කරන විදයම අඩු කරගතහැකි බවත් එම ඩිජිටල්කරණය ඔස්සේම සියලු‍ම ගනුදෙනුවල විගණනයක් කිරීමේ හැකියාව ද ලැබෙන බවත් ශ්‍රී ලංකා පරිගණක සංගමයේ උප සභාපති ඉන්දික ද සොයිසා මහතා පැවසීය.

කොළඹදී පැවැති විශේෂ මාධ්‍ය හමුවකදී ඉන්දික ද සොයිසා මහතා එසේ පැවසීය.

කිව්.ආර්. කේතයක් හරහා සියලු‍ම ගෙවීම් කිරීම මේ වන විට සංචාරක කලාපවල ආරම්භ කර ඇති බව කී ඉන්දික ද සොයිසා මහතා ගාලු‍ කොටුව හෝ පින්නවල වැනි ප්‍රදේශක සංචාරය කළ හොත් ඒ ආකාරයට ගෙවීම් කළ හැකි බව ද සඳහන් කළේය.  

මෙරට ඩිජිටල්කරණ දැනට පවතින ස්ථානයේ සිට රටපුරා ව්‍යාප්ත කිරීම කරන ආකාරය පිළිබඳව මේ වන විට සැලසුම් සකස්කරමින් සිටින බව කී ඉන්දික ද සොයිසා පැවසුවේ හැකි ඉක්මනින් ඩිජිටල් ගෙවීම් රටපුරා ව්‍යාපෘත කිරීමට බලාපොරොත්තු වන බවත්ය.

තොරතුරු තාක්‍ෂණ ක්ෂේත්‍රය කර්මාන්තයක් හැටියට සියලු‍ම දෙනා බදු ගෙවියයුතු යැයි මතයේ සිටින බවත් කෙසේ වෙතත් එම ගෙවන බදුවලින් තොරතුරු තාක්‍ෂණ ක්ෂේත්‍රයට ප්‍රතිලාභයක් ලැබිය යුතු බවත් ඒ මහතා පැවසීය.

එම බදු මුදල්වලින් තොරතුරු තාක්‍ෂණ ක්ෂේත්‍රයට හොඳ පරිසරයක් නිර්මාණය කරනු ඇතැයි විශ්වාස කරන බවත් එවැනි පරිසරයක් නිර්මාණය වුවහොත් රටහැර යන පිරිස ද අඩුවනු ඇති බවත් ශ්‍රී ලංකා පරිගණක සංගමයේ උප සභාපති ඉන්දික ද සොයිසා මහතා කීය.