• වැට් බදු සඳහා පසුගිය මාස 12ක කාලයේදී රු. මිලියන 60 ඉක්ම වූ සේවා සපයා ඇති හෝ අවසාන කාර්තුව තුළදී රු. මිලියන 15 ක් ඉක්මවා සේවා සපයා ඇති අය වැට් ගෙවීමට ලියාපදිංචි වීම අනිවාර්යයි

රංජන් කස්තුරි 

ශ්‍රී ලංකාව තුළ සිදු කෙරෙන ඩිජිටල් සේවා සඳහා සියයට 18 ක එකතු කළ අගය මත බදු (VAT) අයකරන බව දේශීය ආදායම් දෙපාර්තමේන්තුව සඳහන් කරයි.

මෙම වැට් බදු අයකිරීම ලබන ඔක්තෝම්බර් මස 01 වැනි දින සිට ක්‍රියාත්මක බවද එම දෙපාර්තමේතුව සඳහන් කරයි.

2025 අංක 04 දරන එකතු කළ අගය මත බදු (සංශෝධන) පනතේ විධිවිධාන අනුව ඩිජිටල් සේවා සඳහා වැට් බදු අයකෙරන බවද දේශීය ආදායම් දෙපාර්තමේන්තුව සඳහන් කරයි.

ශ්‍රී ලංකාවේ පුද්ගලයකුට විද්‍යුත් වේදිකාවක් හරහා සේවා සපයන අනේවාසික තැනැත්තන් මෙතෙක් ඩිජිටල් සේවා සඳහා වැට්බදු නොගෙ වූ අතර මින් ඉදිරියට වැට් ගෙවීමට යටත්වන බව ද දේශීය ආදායම් දෙපාර්තමේන්තුව කියයි.

තවද වැට් බදු සඳහා පසුගිය මාස 12ක කාලය තුළ දී රු. මිලියන 60 ඉක්ම වූ සේවා සපයා ඇති හෝ අවසාන කාර්තුව තුළදී රු. මිලියන 15 ක් ඉක්මවා සේවා සපයා ඇති අයවළුන් වැට් ගෙවීමට ලියාපදිංචි වීම අනිවාර්ය බවද එම දෙපාර්ත මේන්තුව කියයි.

ශ්‍රී ලංකාවේ පුද්ගලයකුට යම් සේවා ලබා ගැනීමේ දී වැට් බදු ගෙවීමට සිදුවන නමුත් එම සේවාවම ඩිජිටල් වේදිකාවක් හරහා ලබා ගැනීමේදී මෙතෙක් වැට් ගෙවීමට සිදු නොවීය.

එම තත්වය ඇතැම් ව්‍යාපාරවලට අහිතකර ලෙස බලපාන බැවින් සමතුලිත කිරීමේ පියවරක් ලෙස නව වැට් බදු පැනවූ බවද දේශීය ආදායම් දෙපාර්තමේන්තුව කියයි. 

ඒ අනුව පහත සඳහන් ක්ෂේත්‍ර මෙම ඩිජිටල් සේවා ගණයට වැටෙන අතර එම සේවා සඳහා සියයට 18 ක වැට් බද්ද පැනවෙනු ඇත. 

E-commerce Services, Cloud Computing, Software as a service (SaaS), Cybersecurity Services, Digital Marketing & Advertising, IT support & Managed Services, Streaming Services, Fin Tech, Subscription & Membership Website, E-commerce Platforms, Social Media Platforms, On Demand Service Platforms, Content Sharing Platforms, Cloud Collaboration Platforms, Market Place Platforms, Gaming Platforms, Blockchain & NFT Platforms, Apps for hotel bookings and ticket reservations