2022 ජුනි මස 26 වන ඉරිදා
එරික්සන් සමාගම, මොබිටෙල් ආයතනය හා ශ්‍රී ලංකා විවෘත විශ්ව විද්‍යාලය එක්ව සිදුකරන “කනෙක්ට් ටු ලර්න්” අධ්‍යාපනික වැඩසටහන විදුලි සංදේශ සහ ඩිජිටල් යටිතල පහසුකම් අමාත්‍ය හරින් ප්‍රනාන්දු මහතාගේ අතින් විවෘත විය.
එය අර්ත් ඉන්ස්ටිටියුට්, එරික්සන් සහ මිලේනියම් ප්‍රොමිස් යන පාර්ශ්ව එක්වී නිර්මාණය කර ඇත.
තොරතුරු හා සන්නිවේදන තාක්ෂණය උපයෝගී කරගනිමින්, සංවර්ධනය වෙමින් පවතින රටවල් වෙත විසිඑක් වන සියවසේ දියුණු අධ්‍යාපන පහසුකම්වලට සමීප කරවීම මෙහි අරමුණ බව වැඩසටහනේ කළමණාකාරීත්වය කියයි. මේ යටතේ බදුල්ල විවෘත විශ්ව විද්‍යාලයේ භාවිතා කෙරෙන තාක්ෂණය උපයෝගී කරගනිමින් ගැහැනු දරුවන්ට සහ ගුරුවරුන්ට නව සහස‍්‍රයේ අධ්‍යාපන උපාංග හා සම්පත් ප‍්‍රයෝජනයට ගැනීමේ හැකියාව ලැබෙනු ඇත.
ලොව පුරා විසිරී ඇති පාසල් සමග සම්බන්ධ වී සහයෝගී අධ්‍යාපනය, අන්තර් සංස්කෘතික අවබෝධතාව සහ ලෝක මට්ටමේ දැනුම ආදිය ලබාගැනීමේ හැකියාව පවතී. අධ්‍යාපනයේ දියුණුව සඳහා තාක්ෂණය භාවිතා කිරීම මෙහි පාර්ශවකරුවන්ට ඇති පොදු අරමුණක් බව කළමණාකාරීත්වය පවසයි.
වර්තමාන රජය තාක්ෂණ අධ්‍යාපන ක්‍රමයක් සදහා පවතින ක්‍රමය නැවත සකස් කිරීමට ප්‍රමුඛත්වය ලබා දෙන බවත් එමගින් රටේ තාරුණ්‍යය 21 වන සියවස සදහා සුදානම් කරන බවත් විදුලි සංදේශ සහ ඩිජිටල් යටිතල පහසුකම් අමාත්‍ය හරින් ප්‍රනාන්දු මහතා මෙහිදී පැවසීය.
“රටේ වග කිවයුතු ආයතන හැටියට ක්‍රියාකරමින් ජාතිය ගොඩනැගීමේ මෙවන් කාර්යකට සම්බන්ධවීම ගැන මම මෙම ආයතනවලට සුබ පතනවා. අපගේ දැක්ම ග්‍රාමීය ජනතාවගේ ජිවන තත්ත්වය නගා සිටුවීම සහ ඔවුන්ගේ ජිවන මාර්ග ධනවත් කිරීමයි.රටේ පවතින ඩිජිටල් පරතරය අඩු කළ යුතුයි. ඒ සදහා විවිධ හදුන්වාදීම් සහ වැඩසටහන් ක්‍රියාත්මක කරමින් නුතන තාක්ෂණය පහළම මට්ටමේ සිට සිටින අයට ලබාදීම අප කටයුතු කරනවා. අප විශ්වාස කරන්නේ අධ්‍යාපනය හා සමානාත්මතාවය රටේ සිටින සෑම ජන කොටසකටම අයිති දෙයක්.මෙම වැඩසටහන විකල්පයකින් තොරව රැකියා අවස්ථා ලබා දෙන අතර ගැහැණු දරුවන් සවිබල ගැන්වීමෙන් අපිට ජාතිය ද සවිබල ගැන්වීමට හැකියි“යැයි ඒ මහතා කීවේය.
-042
