• රාජ්‍ය මුදල් භාවිතය ක්‍රමවත් කිරීමට අවස්ථාවක්
• අකාර්යක්ෂමතාව තුරන් කෙරෙන පියවරක්

 විමුක්ති එස්. රුද්‍රිගු
ශ්‍රී ලංකාවේ ඇතිව තිබෙන බරපතළ ඖෂධ හිඟය විසඳීම සඳහා පුළුල් ප්‍රසම්පාදන නීතියක් පනවන ලෙස රජයෙන් ඉල්ලා සිටින බව ඇඩ්වොකාටා ආයතනය ප්‍රකාශ කළේය.
අත්‍යාවශ්‍ය ඖෂධ 300 වඩා වැඩි ගණනක ප්‍රමාණවත් තොග නොමැති වීමට ප්‍රසම්පාදන ක්‍රියාවලියේ ප්‍රමාදවීම් සහ දුර්වල සම්බන්ධීකරණය හේතුවී තිබෙන බවත් එය සහ ප්‍රමිතියෙන් තොර ඖෂධ ආනයනය කිරීම සම්බන්ධ ගැටලු‍ සෞඛ්‍ය සේවා පද්ධතියට දැඩි ලෙස බලපෑමක් එල්ල කර ඇති බවත් ඇඩ්වොකාටා ආයතනය පැවසීය. මෙම ගැටලු‍ මිලියන ගණනකගේ ජීවිත අනතුරේ හෙළා ඇති බවද ඇඩ්වොකාටා ආයතනය ප්‍රකාශ කළේය.
ශක්තිමත් ප්‍රසම්පාදන නීතියක් හඳුන්වාදීමෙන් ප්‍රසම්පාදන ක්‍රියාවලිය විධිමත්වී වගවීම බලාත්මක වනු ඇති බවත් එමගින් විනිවිදභාවය සහතික කරනු ඇති බවත් ඇඩ්වොකාටා ආයතනය පැවැසීය. තරඟකාරී ලංසු ක්‍රමයක් සහ පැහැදිලි ගුණාත්මක මිනුම් දඬු ප්‍රවර්ධනය කිරීමෙන් අකාර්යක්ෂමතාව තුරන් කිරීමට, දූෂණය අවම කිරීමට සහ රාජ්‍ය මුදල් භාවිතය ක්‍රමවත් කිරීමට අවස්ථාව ලැබෙන බවද ඇඩ්වොකාටා ආයතනය පෙන්වා දුන්නේය.
සියලු‍ දෙනාට එක හා සමානව ඖෂධ ලැබෙන බවට සහතික කිරීමටත්, මහජන සෞඛ්‍ය සේවාව ශක්තිමත් කිරීමටත්, රෝගීන්ගේ ජීවිත ආරක්ෂා කිරීමටත් මෙම ප්‍රතිසංස්කරණ අත්‍යාවශ්‍ය බව ඇඩ්වොකාටා ආයතනය අවධාරණය කරයි.