• සේවා අංශයෙහි ගැනුම් කළමනාකරුවන්ගේ දර්ශකය 66.0 ක අගයට 
• තොග, සිල්ලර වෙළෙඳාම් සහ මූල්‍ය සේවා හා ක්‍රියාකාරකම් අඛණ්ඩව ඉහළ යාම හේතුවයි 

භානුක අමරසිංහ 

මේ වසරේ ඔක්තෝබර් මාසයේදී සේවා ක්‍රියාකාරකම්වල තවදුරටත් වර්ධනයක් පෙන්නුම් කරමින් සේවා අංශයෙහි ශ්‍රී ලංකා ගැනුම් කළමනාකරුවන්ගේ දර්ශකය 66.0 ක අගයක් සටහන් කර තිබේ.  
මෙය පසුගිය සැප්තැම්බර් මාසයේදී සටහන් වූ 58.7 ක අගයට සාපේක්ෂව වැඩි වේගයකින් ඉහළ යෑමක් ලෙස සඳහන් වන බව මහ බැංකුව පවසයි. මෙහිදී සියලු‍ අංශයන්හි සිදු වූ ශක්තිමත් ක්‍රියාකාරීත්වය ඊට හේතු වී තිබේ. 
 ‘තොග සහ සිල්ලර වෙළෙඳාම් අංශයෙහි වාර්තා වූ වර්ධනය මෙම ප්‍රසාරණයට හේතු විය. මීට අමතරව ණය දීම් ඉහළ යෑම හේතුවෙන් මූල්‍ය සේවා හා සම්බන්ධ ව්‍යාපාර ක්‍රියාකාරකම් අඛණ්ඩව වර්ධනය විය. වෙනත් පෞද්ගලික සේවා හා භාණ්ඩ ප්‍රවාහන සම්බන්ධ ව්‍යාපාර ක්‍රියාකාරකම්ද ඔක්තෝබරයේ ධනාත්මක වර්ධනයට හේතු විය.’ මහ බැංකුව පවසයි. 
මෙහිදී නව ව්‍යාපාර දර්ශකය සැප්තැම්බරයේදී පැවැති 65.2 සිට ඔක්තෝබරයේදී 61.5 ක් දක්වා අඩු වේගකින් ඉහළ ගොස් තිබේ. එසේම සේවා නියුක්තියද 52.5 ක් දක්වා අඩු වේගයකින් ඉහළ ගොස් තිබේ. කෙසේ වෙතත් නිම කිරීමට නියමිත කාර්යයන් සැප්තැම්බර් මාසයේදී මෙන්ම ඔක්තෝබරයේදීද 47.8ක අගයක් සටහන් කරමින් සමාන වේගයකින් පහළ ගොස් තිබේ. 
මේ අතර අපේක්ෂිත ඉදිරි ව්‍යාපාර ක්‍රියාකාකරම් උප දර්ශකය සැප්තැම්බරයේ පැවැති 81.1 සිට ඔක්තෝබරයේදී 84.2ක් දක්වා වැඩි වේගයකින් ඉහළ යෑමක් සහන් කර තිබේ.